Þessi pistill kemur óvenju seint þar sem ég var í fríi um síðustu mánaðarmót, á föstudaginn 30 maí og mánudag 2. júní en 1. júní bar upp á sunnudag, sjómannadaginn. Vinnuvikan var erilsöm og það var ekki fyrr en í rólegheitunum núna um hvítasunnuna að ég gaf mér tíma til að líta yfir verkefni maí mánaðar.
Það má segja að maí 2025 hafi að mörgu leyti snúist um málefni barna og unglinga í Mosfellsbæ.
Í byrjun mánaðarins hóf Bergið göngu sína í Mosfellsbæ en það er ráðgjafaþjónusta fyrir ungmenni og í boði eru endurgjaldslaus viðtöl hjá sérfræðingi. Bergið verður með opið á mánudögum í Mosfellsbæ og fara viðtölin fram að Brúarlandi. Til þess að panta tíma er farið á vef Bergsins og ýtt á hnapp sem heitir ,,Óska eftir þjónustu” og þá fær viðkomandi úthlutað tíma. Í ársskýrslu Bergsins frá árinu 2023 segir um þjónustuna:
„Bergið er skilgreint sem lágþröskuldaþjónusta. Lágur þröskuldur þýðir annars vegar að aðgengi sé gott að þjónustu, að auðvelt sé að fá tíma, að auðvelt sé að nálgast þjónustuna bæði rafrænt og í raunheimum, að hún sé nálægt ungmenninu og ókeypis. Hins vegar að þjónustan miði að því að hvetja ungt fólk að koma, reyna að minnka stimplun og að ungt fólk upplifi að það „megi“ koma í Bergið Headspace, alveg sama hvað. Því eru engar hömlur á því hver getur komið, það þarf ekki greiningu, tilvísun eða útskýringu. Þannig er ekki rætt um geðsjúkdóma eða skilgreiningar á því að ungt fólk komi og lögð áhersla á að ekkert sé og lítið eða of stórt. Eina sem þarf er viljinn til að leita aðstoðar. Sem hluti af því er húsnæði og hönnun umhverfis aðlaðandi og jákvætt og aðlagað þessum aldurshóp.“
Frétt Mosfellsbæjar um opnunina:
Í maí byrjuðum við líka með Opna foreldralínu þar sem foreldrar eða forráðamenn geta pantað milliliðalaust símtöl til sálfræðinga og félagsráðgjafa og rætt um hvaðeina sem tengist því að vera foreldri unglings. Símtölin fara fram á fimmtudögum og hafa símatímarnir verið mjög vinsælir.
Panta símatíma:
Þá hófum við, fyrst allra sveitarfélaga að bjóða upp á opna sálfræðitíma fyrir nemendur unglingastigs í grunnskólunum. Það eru sálfræðingarnir Helgi Þór Harðarson og Daðey Albertsdóttir sem taka á móti nemendum einu sinni í viku, á þriðjudögum. Það þarf ekkert að panta tíma, bara koma við hjá þeim og ræða málin.
Þau Daðey og Helgi kynntu þessa nýjung í Bítinu á Bylgjunni og kynntu jafnframt verkefnið Börnin okkar.
Þessa þjónustuaukningu má rekja til verkefnisins, Börnin okkar en bæjarstjórn ákvað að setja 100 milljónir aukalega til að styrkja forvarnir og vinnu með börnum og unglingum á árinu 2025. Auk ofangreindrar þjónustu hafa verið haldin námskeið fyrir foreldra leikskólabarna, opinn fræðslufundur með Önnu Steinsen fyrir foreldra, aukinn opnunartími í íþróttamannvirkjum fyrir unglinga, aukin viðvera í Bólinu fyrir nemendur á miðstigi og samþykkt að hækka frístundastyrk í haust. Þá hafa verið haldin námskeið með starfsfólki íþróttamannvirkja og UMFA um samskipti við börn og verið er að vinna að undirbúningi að gerð samskiptasáttmála á milli heimila og skóla í öllum skólum bæjarins. Við héldum einmitt opinn vinnufund með foreldrum í Hlégarði í samstarfi við samtök foreldrafélaga í Mosfellsbæ þar sem Vanda Sigurgeirsdóttir frá KVAN kynnti aðferðir við gerð samskiptasáttmála á milli heimila og skóla og stýrði vinnustofu. Við munum hafa frekari vinnufundi með foreldrum á haustmánuðum.
Verkefnið Börnin okkar var ákveðið í ljósi þeirrar miklu fjölgunar barnaverndartilkynninga sem átti sér stað á árinu 2024 en markmiðið er að ná til barna og ungmenna með forvörnum, auknu aðgengi að sérfræðingum og stuðningi við starfsfólk skóla og frístunda og foreldra áður en vandinn er orðinn það mikill að málið þarfnast aðkomu barnaverndar. Það er mjög mikilvægt að samfélagið taki höndum saman og styðji við þessi markmið því við náum ekki árangri nema við stillum öll saman strengi. Við héldum einmitt mjög góða vinnustofu, hópurinn sem kemur að stjórnun þessa verkefnis, sem eru sérfræðingar sem vinna að barnamálum á velferðarsviði og á fræðslu- og frístundasviði ásamt skólastjórum. Forsíðumyndin er einmitt af þessum hópi.
Bæjarráð samþykkti þann 15. maí aðgerðir í verkefninu Barnvænu sveitarfélagi en það er unnið í samstarfi við UNICEF á Íslandi. Verkefnið styður sveitarfélög við að innleiða Barnasáttmála Sameinuðu þjóðanna í alla sína starfsemi. Ungmennaráð skipar stýrihóp verkefnisins ásamt tveimur kjörnum fulltrúum, starfsfólki og umsjónarmanni verkefnisins. Hópurinn hefur forgangsraðað 31 aðgerð og stefnt er að því að skila lokaskýrslu verkefnisins í haust og sækja í framhaldinu um viðurkenningu sem Barnvænt sveitarfélag.
Þá fór kosningin í Krakka Mosó fram þann 20 maí. Það var mjög góð þátttaka en nemendum grunnskóla á mið- og unglingastigi gafst kostur á að taka þátt. Alls voru 1.178 nemendur á kjörskrá og 997 kusu, sem er 85 % kosningaþátttaka. Úrslitin voru kynnt við hátíðlega athöfn í Helgafellsskóla.
Verkefnin sem voru valin voru eru eftirtalin:
- Þrautabraut á vatni
Þrautabraut úr ýmiss konar trjábolum yfir vatn. Fyrirmyndin er vatnsþrautabrautin í Kjarnaskógi fyrir utan Akureyri. Hentar bæði börnum og unglingum. - Stór aparóla
Há og löng aparóla með upphækkuðum byrjunarpalli. Hugsuð fyrir eldri börn og unglinga. Staðsett í brekku þannig að hægt sé að ná ágætis hraða. Nógu há til þess að fæturnir rekist ekki í jörðina. - Snúningsróla
Snúningsróla með fjórum örmum og sætum. Rólan fer í hringi og upp og niður á sama tíma. Hugsuð fyrir börn frá sex ára aldri.
Um þessar mundir fer fram staðarvalskönnun en stefnt er að því að hefja framkvæmdir núna í sumar.
Þá veitti íþrótta- og tómstundanefnd styrki til efnilegra ungmenna og ungmennaráð fundaði með bæjarstjórn á mjög góðum fundi.
En það var ekki allt jafn skemmtilegt í maí mánuði þar sem frumvarp um breytingar á Jöfnunarsjóði er í meðförum umhverfis- og samgöngunefndar en með breytingunni falla niður tekjur, um 250 milljónir króna á ári til Mosfellsbæjar. Við skrifuðum ítarlega umsögn um málið, reyndar þriðja umsögnin þar sem frumvörp að breytingum á sjóðnum eru orðin þrjú sem hafa verið lögð fram á síðastliðnum tveimur árum. Þá mætti ég á fund umhverfis- og samgöngunefndar þingsins til að kynna okkar sjónarmið, skrifaði grein á Vísi og fór í viðtal á Rás 2.
Í maí var lögð fram áhættugreining fyrir Mosfellsbæ til næstu 10 ára. KPMG vann greininguna fyrir Mosfellsbæ og í henni er farið ítarlega yfir reksturinn, helstu áhættur framundan, samninginn um Blikastaði og spá um íbúafjölgun og uppbyggingu í hverfinu auk þess sem gerð er tillaga að fjárhagslegum markmiðum fyrir bæjaryfirvöld. Það er ljóst að nokkrir þættir hafa umtalsverð áhrif á fjárhag bæjarsjóðs á komandi árum. Fyrst ber að telja þá stöðu sem er í skólabyggingum í bænum, þ.e. kostnaði við endurbyggingu á Kvíslarskóla, rakavanda í kjallara Varmárskóla sem þarfnast viðgerða og stöðuna á Hlaðhömrum en ljóst er að ráðast þarf í kostnaðarsama uppbyggingu á leikskólanum vegna skemmda.
Þá hefur frumvarpið um Jöfnunarsjóð mikil áhrif á stöðu bæjarsjóðs auk þess vaxtaumhverfis sem sveitarfélögin búa við. Um þessar mundir fer fram undirbúningur að fjárhags- og fjárfestingaáætlun 2026 og þriggja ára áætlun og ljóst að það þarf að sýna töluvert aðhald í rekstrinum. Í upphafi árs var farið í 200 milljóna króna hagræðingu og það tók vissulega á en markmiðið var að fara í rekstrartiltekt sem hefði eins takmörkuð áhrif á þjónustu við bæjarbúa og unnt væri. Það tókst ágætlega en áframhaldandi hagræðingaraðgerðir munu á endanum kunna að leiða til þjónustuskerðingar og/eða hækkun gjalda. Eins og fram kemur í þessari umfjöllun þá eru leikskólagjöld lang lægst í Mosfellsbæ. Þrátt fyrir það er meðalaldur þeirra barna sem komast í leikskóla á meðal þeirra yngstu í stærstu sveitarfélögum landsins. Hér er frétt sem birtist á mbl.is þann 7. júní með samanburði á leikskólagjöldum á milli stærstu sveitarfélaga landsins.
Mosfellsbær er ört vaxandi sveitarfélag og það er ljóst að miðað við verkefnafjöldann þá hefur verið mikil þörf á því að bæta þjónustuna í skóla- og ráðgjafaþjónustu og jafnframt í barnaverndarþjónustu og stuðningsþjónustu velferðarsviðs. Fjármagnið í verkefnið Börnin okkar, fara meðal annars til að styrkja þessa þjónustu auk áherslna á forvarnir í gegnum Bólið og lýðheilsuverkefni.
Forsíðumyndin er frá vinnudegi stýrihóps um Börnin okkar sem var haldinn í Hlégarði á miklum blíðviðrisdegi.
Þá er mynd frá athöfninni í Helgafellsskóla þegar úrslit KrakkaMosó voru kynnt. Einnig af þessum hressu stelpum úr 10 bekk sem héldu plöntusölu í gróðurhúsinu til að safna fyrir útskriftarferð.
Einnig er mynd frá mjög skemmtilegri heimsókn í Huldugötu til byggingarfélagsins Bakka sem var að afhenda síðustu íbúðirnar í nýjum fjölbýlishúsum. Mosfellsbær, húsnæðis- og mannvirkjastofnun og Bakki hafa átt mjög gott samstarf um uppbyggingu íbúða í Huldugötu 2-4 og 6-8 sem uppfylla skilyrði til þess að fá hlutdeildarlán. Meðal annars var gerð deiliskipulagsbreyting til að liðka fyrir uppbyggingunni með hagmuni ungs fólks og fyrstu kaupenda að leiðarljósi. Á myndinni með mér er Örn Kjærnested framkvæmdastjóri byggingarfélagsins Bakka.
Þá er mynd frá mjög vel heppnuðu opnu húsi í Kvíslarskóla í tilefni þess að skólinn var 50 ára fyrir tveimur árum en ákveðið var að halda veglega upp á það, þegar allar endurbætur á húsnæðinu væru búnar.
Njótið sumarsins og góða veðursins sem er á næsta leiti en spáð er heilsól á höfuðborgarsvæðinu alla næstu daga.
