Í vikunni var opinn umræðufundur og vinnustofa með foreldrum á vegum Mosfellsbæjar í samstarfi við SAMMOS (Samtök foreldrafélaga grunnskóla Mosfellsbæjar) þar sem rætt var um verkefnið Börnin okkar og unnið að mótun samskiptasáttmála fyrir skólasamfélagið í Mosfellsbæ. Um 30 foreldrar mættu til fundarins og tóku virkan þátt en fundurinn var sjálfstætt framhald af fundum sem haldnir voru fyrr á þessu skólaári.
Sáttmálinn er ein af lykilaðgerðum verkefnisins Börnin okkar og verður hann þróaður áfram með þátttöku nemenda, starfsfólks leik- og grunnskóla, frístundaheimila, félagsmiðstöðva og íþróttafélaga. Stefnt er að því að sáttmálinn verði lifandi og sameiginlegt verkfæri til að efla samskipti, virðingu og velferð í skólasamfélaginu í bænum.
Vanda Sigurgeirsdóttir frá KVAN stýrði vinnustofunni þar sem fjölmörg gagnleg sjónarmið, hugmyndir og reynsla foreldra kom fram og verður það nýtt í áframhaldandi vinnu.
Mosfellsbær þakkar foreldrum fyrir virka þátttöku og mun leggja áherslu á áframhaldandi samtal og samráð við fjölskyldur bæjarins í þessu mikilvæga umbótaverkefni.
