Mosfellsbær veitir árlega einstaklingum og félagssamtökum styrki til margvíslegrar starfsemi.
Annarsvegar er um að ræða árlega styrki sem auglýstir eru sérstaklega svo sem menningarstyrkir á hendi menningar- og lýðræðisnefndar, styrkir til verkefna á sviði fjölskylduþjónustu í Mosfellsbæ á vegum velferðarsviðs og hinsvegar eru almennir styrkir eða styrktarlínur til ýmiskonar verkefna sem falla ekki undir árlega styrki.
Upphæðir styrkja ráðast af fjárheimildum í fjárhagsáætlun ár hvert.
Afreksfólk í félögum utan Mosfellsbæjar
Afreksfólk í Mosfellsbæ og þjálfarar/leiðbeinendur sækja um styrki innan síns íþrótta- og tómstundafélags. Félög með samstarfsamning við Mosfellsbæ fá á hverju ári framlag frá Mosfellsbæ í afreks- og styrktarsjóð til að mæta kostnaði afreksfólks vegna æfinga og keppnisferða og til að auðvelda þjálfurum/leiðbeinendum að efla sig í starfi. Hvert félag um sig ráðstafar þessum fjármunum í samræmi við það.
Með þessum styrk er verið að huga að því afreksfólki í Mosfellsbæ sem stundar íþrótt/tómstund með félögum utan bæjarins.
Bæjarlistamaður
Umsóknarfrestur rann út 11. ágúst 2024.
Menningar- og lýðræðisnefnd Mosfellsbæjar óskar eftir umsóknum og tilnefningum frá Mosfellingum um einstakling eða samtök listafólks í Mosfellsbæ sem bæjarlistamaður Mosfellsbæjar 2024.
Allt starfandi listafólk, listahópar og samtök sem starfa í Mosfellsbæ koma til greina og nefndin metur allar umsóknir og tilnefningar sem fram koma.
Útnefning bæjarlistamanns fer fram í tengslum við bæjarhátíð Mosfellsbæjar, Í túninu heima.
Umsóknir og tilnefningar skulu berast rafrænt í gegnum þjónustugátt bæjarins og þurfa að hafa borist í síðasta lagi 11. ágúst 2024.
Efnilegt ungt fólk
Umsóknarfrestur rann út 20. febrúar 2025.
Íþrótta- og tómstundanefnd Mosfellsbæjar auglýsir eftir umsóknum vegna úthlutunar styrkja til efnilegra ungmenna sem leggja stund á íþróttir, tómstundir eða listir yfir sumartímann.
Öll ungmenni á aldrinum 16-20 ára, (f. 2005, 2006, 2007 og 2008) með lögheimili í Mosfellsbæ, sem skara fram úr og/eða hafa sýnt sérstaka hæfileika á sínu sviði geta sótt um styrkinn.
Markmið styrksins er meðal annars að gefa einstaklingum sömu tækifæri og jafnöldrum þeirra til að njóta launa frá bænum á sama tíma og þau stunda list sína, íþrótt eða tómstund yfir sumartímann. Styrkurinn er fólginn í launum frá Mosfellsbæ og greitt í samræmi við önnur sumarstörf hjá Mosfellsbæ.
Sótt er um á Mínum síðum Mosfellsbæjar.
Greiðsla fasteignaskatts til félaga og félagasamtaka
Umsóknarfrestur rann út 28. febrúar 2025.
Mosfellsbær auglýsir eftir umsóknum um styrk til greiðslu fasteignaskatts til félaga og félagasamtaka. Um er að ræða styrki til greiðslu fasteignaskatts af fasteignum þar sem fram fer starfsemi sem ekki er rekin í ágóðaskyni.
Klörusjóður
Markmið Klörusjóðs er að stuðla að framþróun á skóla- og frístundastarfi í Mosfellsbæ. Sjóðurinn er ætlaður til að styrkja verkefni sem unnin eru í einstökum skólum eða í samstarfi á milli skóla.
Veittir eru styrkir einu sinni á ári úr sjóðnum. Heildarframlag sjóðsins árið 2025 eru þrjár og hálf milljón og í ár var ákveðið að áhersluatriði umsóknar verði með vísan í Börnin okkar, aðgerðaráætlun Mosfellsbæjar sem snýr að bættu umhverfi í þágu barna- og unglinga.
Í nýsköpunar- og þróunarsjóðinn geta sótt einstaka kennarar, kennarahópar, aðrir fagaðilar sem starfa við skóla/frístund í Mosfellsbæ, einn skóli eða fleiri skólar/fagaðilar í sameiningu sem og fræðslu- og frístundasvið í samstarfi við skóla.
Sótt er um á Mínum síðum Mosfellsbæjar. Umsóknarfrestur er til 15. apríl 2025.
Sækja um:
Listviðburðir og menningarmál
Umsóknarfrestur rann út 8. mars 2025.
Menningar- og lýðræðisnefnd Mosfellsbæjar auglýsir eftir umsóknum um styrki vegna listviðburða og menningarmála árið 2025.
Umsækjendur geta verið einstaklingar, fyrirtæki, félagasamtök eða stofnanir, innan sem utan Mosfellsbæjar.
Fjárframlög til lista og menningarmála eru af tvennum toga:
- Fjárframlög til almennrar listastarfsemi
- Fjárframlög vegna viðburða eða verkefna
Umsóknum skal skilað í síðasta lagi þann 8. mars 2025 á Mínum síðum Mosfellsbæjar.
Niðurstöður Menningar- og nýsköpunarnefndar Mosfellsbæjar munu liggja fyrir eigi síðar en 18. mars 2025 og eru háðar samþykki bæjarstjórnar.
Nýsköpunarstyrkur
Umsóknarfrestur rann út 28. maí 2024.
Lumar þú á frumlegri hugmynd sem gæti gert gott samfélag enn betra? Sæktu um nýsköpunarstyrk Mosfellsbæjar og hugmyndin þín gæti orðið að veruleika. Upphæð styrksins er 1.000.000 kr.
Skilyrði er að nýsköpunarverkefnið tengist eða gagnist Mosfellsbæ á einhvern hátt.
Verkefni á sviði velferðarmála
Umsóknarfrestur rann út 30. nóvember 2024.
Velferðarnefnd Mosfellsbæjar auglýsir eftir umsóknum um styrki til verkefna á sviði velferðarmála í Mosfellsbæ.
Afgreiðsla styrkumsókna fer fram fyrir lok febrúar 2025.
Aðilar sem fengu styrk á síðasta ári þurfa að skila inn greinargerð um ráðstöfun þess fjár.