Þessi vika var ótrúleg! Hápunkturinn var í gær, fimmtudag þegar ég skrifaði undir samninga við fulltrúa IOGT sem reka Skálatún, mennta- og barnamálaráðherra og innviðaráðherra um yfirtöku á þjónustu Mosfellsbæjar á Skálatúni og afhendingu eigna og afnot af landi til uppbyggingar á þjónustu við börn og ungmenni á Íslandi. Þar verður miðstöð farsældar barna með öllum helstu stofnunum í málaflokknum.
Samningarnir voru einróma samþykktir í bæjarstjórn fyrr um morguninn. Við höfum unnið að þessum samningum í marga mánuði og það þurfti ótrúlega margt að spila saman til að þetta gengi upp, fjárhagslega en líka stjórnsýslulega. Það er búið að vera frábært að vera samferða Ásmundi Einari Daðasyni mennta-og barnamálaráðherra í þessari vegferð en það eru fjölmargir sem hafa lagt hönd á plóg. Af hendi Mosfellsbæjar voru það auk mín þær Þóra Hjaltested bæjarlögmaður og Sigurbjörg Fjölnisdóttir framkvæmdastjóri velferðarsviðs sem unnu að málinu og við fengum mikinn stuðning frá allri bæjarstjórninni, sem er gríðarlega mikils virði. Halla Karen Kristjánsdóttir formaður bæjarráðs flutti þakkarræðuna fyrir hönd bæjarstjórnarinnar við athöfnina sem var haldin í vinnustofum í Skálatúni en hún hefur staðið ötullega við bakið á okkur í þessari vinnu.
Fimmtudagurinn hófst með fundi í bæjarráði kl. 7.30, þá var haldinn aukafundur í bæjarstjórn kl. 9.00 og svo hélt ég starfsmannafund, til að kynna málið fyrir samstarfsfólki á bæjarskrifstofunum. Í framhaldi héldum við starfsmannafund í Skálatúni þar sem var mjög góð mæting en það starfa rúmlega 100 manns þar. Í framhaldi af þeim fundi hélt ég fund með íbúum Skálatúns og aðstandendum þeirra og það voru líklega um 70 – 80 manns á þeim fundi. Það komu fjölmargar spurninga á fundinum, meðal annars hvað verður um þá fötluðu íbúa sem búa á Skálatúni í dag. Okkar svör voru þau að við förum í þetta verkefni með virðingu við íbúana að leiðarljósi og berum hag þeirra fyrst og fremst fyrir brjósti. Þeir sem þess óska fá að búa áfram á Skálatúni en við munum þurfa að bretta upp ermar og bjóða upp á aðra búsetukosti fyrir þá sem vilja búa sjálfstæðar. Næstu vikur og mánuðir fara í að kynnast íbúum og starfsmönnum og um helgina auglýsum við eftir leiðtoga í málaflokk fatlaðs fólks hjá Mosfellsbæ. Hér má finna hlekk í frétt Mosfellsbæjar um málið og þar er líka slóð í tillöguna sem var lögð fyrir bæjarráð og bæjarstjórn. Forsíðumyndin er af okkur Ásmundi Einari Daðasyni við undirritun samninga og Lóu sem býr á Skálatúni en við fengum að sjálfsögðu leyfi til þess að taka myndir.
Annar stór dagur var á miðvikudag en þá samþykkti bæjarstjórn tillögur í 14 liðum um stjórnkerfisbreytingar og nýtt skipurit Mosfellsbæjar. Samþykkt var að starfsemi Mosfellsbæjar skiptist í fjögur fagsvið, tvö stoðsvið og tvær skrifstofur. Fagsviðin verða velferðarsvið, fræðslu- og frístundasvið, umhverfissvið og menningar-, íþrótta og lýðheilsusvið. Stoðsviðin verða fjármála- og áhættustýringarsvið og mannauðs- og starfsumhverfissvið. Skrifstofurnar verða skrifstofa bæjarlögmanns og skrifstofa umbóta og þróunar. Skipuritið mun taka gildi 1. september 2023. Tillögurnar byggja á greiningu og ábendingum í stjórnsýslu- og rekstrarútekt sem unnin var á tímabilinu janúar til apríl 2023 af ráðgjafarfyrirtækinu Strategíu. Viðfangsefni stjórnsýslu- og rekstrarúttektarinnar voru þríþætt. Í fyrsta lagi að greina fjárhag og rekstur sveitarfélagsins. Í öðru lagi að greina stöðu og tækifæri á sviði stafrænnar umbreytingar. Og í þriðja lagi að skoða gildandi stjórnkerfi og stjórnunarhætti, lýsa stöðunni og koma með ábendingar um æskilegar umbætur. Nánar tiltekið eru um 74 umbótatillögur að ræða sem bæjarstjórn þarf að taka afstöðu til og í framhaldinu að forgangsraða þeim sem samþykkt verður að vinna með.
Leiðarljós við mótun nýs skipurits Mosfellsbæjar var að horfa á verkefnin út frá áherslum sveitarfélagsins og efla þjónustu við bæjarbúa í stækkandi sveitarfélagi. Með nýju skipulagi teljum við að það gefist aukið svigrúm til að skerpa á áherslum varðandi stjórnarhætti, efla áhættu- og árangursmat, samhæfa verkefni á milli sviða og deilda, fylgja eftir umbótum og nýta betur þá tækniþróun sem hefur orðið í samfélaginu.
Hér er slóð á tillögu um stjórnkerfisbreytingar og hér má finna skýrslu Strategíu.
Af öðrum mikilvægum málum vikunnar má nefna verkföll félaga í BSRB sem hefur mikil áhrif á samfélagið hér. Í næstu viku þurfum við að loka þremur leikskólum og í fimm öðrum skólum verður starfið skert. Síðan er boðað til allsherjarverkfalls þann 5 júní sem hefur áhrif á leikskóla, íþróttamannvirki og bæjarskrifstofurnar. Bæjarráð Mosfellsbæjar fjallaði um málið á fundi sínum í gær, fimmtudag og lýstu bæjarfulltrúar yfir þungum áhyggjum af stöðunni. Það eru miklir hagsmunir fyrir Mosfellsbæ að það verði samið sem allra fyrst enda um mikilvæg störf að ræða, sem snerta daglegt líf flestra bæjarbúa.
Ég afhenti fyrstu tvískiptu tunnuna fyrir matarleifar og blandaðan úrgan til hjónanna Halldórs Þórarinssonar og Sigrúnar Wöhler sem búa að Hamratúni 6 snemma á miðvikudagsmorgni. Þau fengu plastkörfu og búnt af bréfpokum til að safna matarleifum úr eldhúsi ásamt tunnunni.
Dreifingin er því hafin í Mosfellsbæ og má sjá dreifingaráætlunina hér.
Við fáum þó nokkuð af fyrirspurnum um það hvers vegna ekki er hægt að fá tvær tvískiptar tunnur í stað þriggja tunna. Þegar farið var af stað með þetta verkefni þá var það alltaf hugmyndin, að afhenda tvær tvískiptar tunnur, annarsvegar fyrir pappa og plast og hinsvegar fyrir blandaðan úrgang og matarleifar. Það kom svo í ljós að ein tvískipt tunna hefur ekki nægjanlegt rúmmál fyrir það magn af plasti og pappa sem safnast saman og er hirt einu sinni í mánuði og því var þessi lausn valin. Plastið hefur tilhneigingu til að festast ef það hefur ekki nægt rúmmál og því var það mat sérfræðingahóps sem hefur verið saman að störfum í öllum sveitarfélögum höfuðborgarsvæðisins að þrjár tunnur væru nauðsynlegar. Sveitarfélögin eru þó tilbúin að skoða málið þegar reynsla er komin á flokkunina og hugsanlega endurskoða þá afstöðu. Ég veit til þess að sumir sem eru til dæmis með steypta umgjörð utan um tunnurnar ætla að hafa pappírstunnuna í bílskúrnum, að minnsta kosti til að byrja með. Ég minni líka á opna kynningarfundi í Bókasafni Mosfellsbæjar sem eru auglýstir á vef og facebook síðu bæjarins en þar er hægt að fara nánar yfir þessi mál með fulltrúum á umhverfissviði sem annast umsjón með innleiðingunni á nýju kerfi. Svo er Sorpa með ítarlegar leiðbeiningar sem eru hér að finna.
Í vikunni var líka skrifað undir samninga um glugga og innréttingar í Kvíslarskóla og nemur upphæðin samtals um 450 mkr. Um er að ræða endurinnréttingu fyrstu hæðar skólans sem verður í höndum E. Sigurðsson ehf. sem var lægstbjóðandi í verkið og felur meðal annars í sér endurnýjun á bæði almennum kennslustofum og þeim sem ætlaðar eru fyrir sérkennslu, geymslum og aðstöðu fyrir starfsfólk mötuneytis. Þá verður loftræstikerfi hæðarinnar endurnýjað og áhersla lögð á góða hljóðvist. Samningur var einnig undirritaður við fyrirtækið Múr- og málningarþjónustan Höfn ehf. sem var lægstbjóðandi um endurnýjun glugga á báðum hæðum Kvíslarskóla. Gluggar á fyrstu hæð verða síkkaðir og felur verkið einnig í sér endurnýjun á dyrum og neyðarútgöngum á annarri hæð. Verkefnin hefjast strax og er gert ráð fyrir verklokum í október samkvæmt verkáætlunum. Skólahald hefst á eðlilegum tíma að afloknu sumarfríi og reynt verður að valda sem minnstri röskun vegna framkvæmdanna á skólatíma.
Í dag var haldinn fundur með forystufólki ASÍ vegna húsnæðismála en formaður og fulltrúar aðildarfélaganna hafa óskað eftir að hitta forsvarsfólk sveitarfélaganna til þess að fara yfir stöðu húsnæðismála og hverjar fyrirætlanir sveitarfélaganna eru, ekki síst þegar kemur að uppbyggingu óhagnaðardrifins húsnæðis. Þetta var góður og gagnlegur fundur um þessi mikilvægu mál.
Við áttum líka fund með forstjóra Orkuveitunnar í vikunni og samstarfsfólki til að fara yfir ýmsa kosti til öflunar orku.
Um helgina verða auglýstar nokkrar stjórnendastöður í Mosfellsbæ. Um er að ræða lausar stöður vegna þess að stjórnendur hafa fært sig um set eða eru að hætta vegna aldurs. Síðan eru nýjar stöður, annarsvegar staða skrifstofustjóra umbóta og þróunar og staða leiðtoga í málaflokki fatlaðs fólks. Auglýsingarnar birtast í fjölmiðlum um helgina og á vef ráðgjafafyrirtækisins Intellecta sem annast umsjón með ferlinu.
Góða helgi!
