Þvílík menningarveisla á bæjarhátíðinni Í túninu heima! Þetta var mín fyrsta hátíð og því einstök upplifun að taka þátt í brekkusöngnum og öllum þeim frábæru viðburðum sem voru um allan bæ. Ég viðurkenni að ég var aðeins stressuð yfir veðrinu á laugardeginum og það var auðvita mjög blautt frameftir degi en svo stytti upp rétt fyrir götugrill og stórtónleikana sem heppnuðust mjög vel. Ég náði að fara nokkuð víða, meðal annars á tvenna garðtónleika sem breyttust í stofutónleika með frábærri stemningu og á allskyns viðburði hér og þar um bæinn. Fékk mér mjög bragðsgóða kjötsúpu Friðriks, hamborgara frá handknattleiksdeildinni, úkraínska Borcsh súpu og vöfflur frá skátunum, svo fátt eitt sé nefnt. Fjölmennustu viðburðirnir voru brekkusöngurinn í Álafosskvosinni og stórtónleikarnar á miðbæjartorginu en aðsóknin á báða þessa viðburði sló met. Að sögn fulltrúa í gæslunni hjá okkur, Bólinu og björgunarsveitinni, gengu bæði kvöldin nokkuð vel og ekki mikið um árekstra. Við áttum líka mjög notalega stund, nágrannarnir í Skeifunni í Leirutanganum en við grilluðum saman og sátum til borðs í fallega skreyttum bílskúr. Þessi dagskrárliður er mjög skemmtilegur þar sem þetta kallaði á undirbúning og spjall á milli góðra granna sem sumir höfðu lítið hist áður.
Dagskráin var mjög hátíðleg í Hlégarði á sunnudeginum þar sem umhverfisviðurkenningar voru veittar, einnig starfsaldursviðurkenningar og loks var bæjarlistamaður útnefndur en það er hljómsveitin Gildran sem fékk þann heiður fyrir árið 2023. Hljómsveitin sem er skipuð þeim Þórhalli Árnasyni, Karli Tómassyni, Birgi Haraldssyni og Sigurgeiri Sigmundssyni hóf sinn feril í Mosfellsbæ árið 1985.Í umsögn dómnefndar kemur fram að Gildran hafi starfað í áratugi í Mosfellsbæ og er órjúfanlegur hluti af menningarlífi bæjarins. Gildran hefur gefið út sjö plötur og mun koma fram á fernum tónleikum í Hlégarði í haust.
Vikan hófst með fundi á vegum Sambands íslenskra sveitarfélaga þar sem farið var yfir stöðuna í málefni fatlaðs fólks og vinnu starfshóps sem var skipaður fyrir ári síðan til að greina betur kostnað vegna málaflokksins og koma með tillögur að kostnaðarskiptingu ríkis og sveitarfélaga.
Þá hefur vikan farið töluvert í undirbúning skipulagsbreytinga og þá vegferð sem við erum á í umbótastarfi þegar kemur að stjórnun og skipulagi á bæjarskrifstofum. Nýtt skipurit tekur gildi í dag, föstudaginn 1. september. Þá tekur ný framkvæmdastjórn til starfa sem er skipuð nýju fólki í bland við reynslubolta sem hafa verið lengi við störf hjá Mosfellsbæ.
Það vakti athygli þegar við gerðum frétt á vefinn í sumar um ráðningu sjö nýrra stjórnenda hjá bænum og þegar svipuð frétt birtist í Mosfellingi. Einhverjir hafa gagnrýnt þetta og talið að þarna væri „báknið“ að blása út. Það er misskilningur því þarna er aðeins um eitt nýtt stöðugildi að ræða. Stöðurnar sem voru auglýstar í vor og ráðið í í sumar eru eftirtaldar:
- Leiðtogar í grunn- og leikskólamálum
- Leiðtogi í málefni fatlaðs fólks
- Leiðtogi umhverfis og framkvæmda
- Leiðtogi Mosfellsveitna
- Sviðsstjóri mannauðs og starfsumhverfis
- Skrifstofustjóri umbóta og þróunar
Nýja starfið er skrifstofustjóri umbóta og þróunar sem Ólafía Dögg Ásgeirsdóttir var ráðin í og hún kemur til starfa 1. október. Aðrar ráðningar koma til í stað stjórnenda sem hafa hætt hjá Mosfellsbæ á á þessu ári og farið til annarra starfa eins og framkvæmdastjóri fræðslu og frístundasviðs, mannauðsstjóri, umhverfisstjóri og forstöðumaður Mosfellsveitna. Þá var staða framkvæmdastjóra Skálatúns lögð niður og ráðið í stöðu leiðtoga í málefna fatlaðs fólks en við tókum við 33 þjónustuþegum í sumar frá Skálatúni og 110 nýjum starfsmönnum. Loks voru tvær stöður á fræðslu og frístundaviði lausar, annarsvegar stöður verkefnisstjóra leikskóla og hinsvegar grunnskóla en þær sem hafa gengt þeim stöðum höfðu óskað eftir að láta af störfum, önnur vegna aldurs og hin fer tímabundið í hlutverk sviðsstjóra fræðslu og frístundavsiðs. Ég sótti um heimild til bæjarráðs í vetur til að fresta ráðningum sviðsstjóra og mannauðsstjóra á meðan að stjórnsýslu og rekstrarúttekt Strategíu stóð yfir, til að hafa frjálsari hendur við skipulagningu nýrra starfa. Það hefði ef til vill verið ,,pólitískt klókt að ráða inn einn og einn nýjan stjórnanda þar sem það hefði vakið minni athygli en þannig hefðum við misst af tækifærinu til að gera breytingar og fá inn sterkt teymi.
Á þriðjudag var ég með forstöðumannafund í Hlégarði þar sem við fórum yfir helstu áherslur vetrarins og tæknilegar áskoranir auk þess sem við fengum utanaðkomandi aðila til að vera með fyrirlestur um liðsheild og breytingar. Á miðvikudag var vinnudagur velferðarsviðs þar sem öllum starfsmönnum sviðsins var boðið og var markmiðið að hrista saman hópinn með nýja starfsfólkinu sem kom frá Skálatúni og þeim starfsmönnum sem fyrir voru. Miðvikudagurinn var líka sögulegur í öðru tilliti því þá var haldinn stofnfundur sjálfseignastofnunarinnar Skálatúns í mennta- og barnamálaráðuneytinu að viðstöddum ráðherra. Formaður stjórnar er Haraldur L. Haraldsson sem kom að undirbúningi yfirfærslu Skálatúns til Mosfellsbæjar og aðrir í stjórn eru Þorbjörg Helga Vigfúsdóttir skipuð af mennta- og barnamálaráðherra og ég fyrir hönd Mosfellsbæjar. Það er verkefni að vinna, að undirbúa svæðið fyrir framtíðina með þá sýn að þarna verði miðstöð barna og fjölskylduþjónustu á Íslandi. Sama dag var einnig athöfn í ráðuneytinu þar sem við afhentum ráðherra skýrslu starfshóps um börn með fjölþættan vanda en ég sat í starfshópi sem mótaði tillögur að úrræðum fyrir þennan hóp. Yfirvöld á Íslandi eiga ekki í dag nein úrræði fyrir þessi börn, sem eru með mjög alvarlegan tilfinninga-, hegðunar og geðrænan vanda og hafa sveitarfélögin þurft að treysa á einakaðila, s.s. Klettabæ og Vinakot til að vista þessi börn. Þar með tapast möguleiki á að þróa á einum stað sérfræðiþekkingu og meðferð fyrir þennan viðkvæma hóp.
Ég hef starfað í Mosfellsbæ í eitt ár í dag, 1. september. Eins og ég hef oft sagt opinberlega þá er ég óendanlega þakklát fyrir að hafa verið treyst fyrir þessu verkefni, að vera bæjarstjóri Mosfellsbæjar. Hér eru sterkar stofnanir og frábært starfsfólk og mikil samkennd og samhugur í samfélaginu sem sást best í nýafstaðinni bæjarhátíð.
Það eru þó verk að vinna, við að móta framtíðarsýn í skipulagsmálum, íþróttastarfi, velferðarmálum og fjölmörgum málaflokkum auk þess að efla þjónustuna við bæjarbúa enn betur. Ég hlakka svo sannarlega til þessa verkefnis næstu misserin.
Góða helgi!
