Gleðilegt ár kæru íbúar og starfsfólk Mosfellsbæjar og takk fyrir samfylgdina síðastliðna mánuði.
Sólin fer hækkandi á lofti og það hefur ýmislegt drifið á dagana frá því að ég setti inn síðasta pistil, þann 16. desember. Það fór að snjóa svo um munar helgina 17 -18 desember og er talað um að annað eins fannfergi hafi ekki sést á suðvesturhorninu á þessari öld. Þó að snjókoma sé árviss viðburður þá reynir alltaf mikið á innviði sveitarfélaga þá daga sem snjó kyngir niður en kannski ekki síður í framhaldinu. Við búum svo vel að vera með frábært starfsfólk og verktaka í Mosfellsbæ. Það er farið eftir ákveðnum forgangslista við val á götum og er byrjað á að tryggja sem fyrst greiða umferð um þær götur og stíga sem mikilvægastar eru til samgangna. Stofnbrautir, strætóleiðir og fjölfarnar safngötur njóta þannig forgangs í þjónustu, ásamt tengistígum í hverfum og göngustígum.
Hægt er að sjá staðsetningu gatna og stíga í forgangi á kortavef Mosfellsbæjar. Þá hefur einnig verið safnað saman upplýsingum um snjómokstur á vef bæjarins.
Á mánudeginum 19. desember kom upp bilun í Hellisheiðavirkjun og öllum sundlaugum á höfuðborgarsvæðinu var lokað í tæpa tvo sólarhringa vegna þessa og voru Lágafellslaug og Varmárlaug opnaðar aftur eftir hádegi 21. desember.
Þriðjudaginn 20. desember ég viðstödd útskrift nemenda í framhaldsskólanum í Mosfellsbæ sem var mjög líflegur og skemmtilegur viðburður. 24 nemendur voru að útskrifast en þeir eiga það sameiginlegt að hafa varið stórum hluta náms síns í fjarkennslu vegna Covid. Starfandi skólameistari Valgarð Már Jakobsson lagði mikið upp úr kennsluháttum skólans í útskriftarræðunni en kennsluaðferðirnar og leiðsagnarmatið hefur þróast mikið í skólanum á undanförnum árum og er orðið mjög samfléttað.
Sama dag sótti ég stjórnarfund hjá Reykjalundi endurhæfingu ehf en ég var kjörin sem fulltrúi Mosfellbæjar í stjórninni síðastliðið haust. Það var tekin ákvörðun haustið 2019 að einn fulltrúi í stjórninni væri fulltrúi bæjarins, til að efla tengslin á milli þessa fjölmenna vinnustaðar bæjarbúa og Mosfellsbæjar.
Þegar leið á vikuna fyrir jól bárust upplýsingar um að minkar hefðu sést í Reykjahverfi. Meindýraeyðir á vegum bæjarins fór strax af stað og náði að fanga þrjá minka í hverfinu en talið var að þeir hefðu sloppið úr minkabúi í Helgafellsdal. Eigandi búsins kom síðan fram í fjölmiðlum og staðfesti þann grun. Fjöldi minka hefur verið veiddur í Mosfellsdal og víðar í kjölfarið.
Síðasti fundur bæjarráðs Mosfellsbæjar var haldinn 22. desember og ennfremur aukafundur bæjarstjórnar. Tilefni aukafundarins var að samþykkja hækkun útsvars en samþykkt var með öllum greiddum atkvæðum tillaga um að álagningarhlutfall útsvars fyrir árið 2023 hækki um 0,22% og verði 14,74% á tekjur einstaklinga, sbr. ný samþykkta breytingu á 1. mgr. 23. gr. laga um tekjustofna sveitarfélaga. Hækkunin er gerð í tengslum við samkomulag ríkis og sveitarfélaga um breytingu á fjármögnun á þjónustu við fatlað fólk. Samhliða þessum breytingum mun ríkið lækka tekjuskattsprósentur svo íbúar verði ekki fyrir aukinni skattheimtu vegna breytinganna.
Samkomulagið felur ennfremur í sér að unnið verði áfram að greiningu á þróun útgjalda vegna þjónustunnar og leitast við að ná samkomulagi um styrkingu á fjárhagsgrundvelli hennar á næsta ári. Þetta er því mikið gleðiefni, að ná þessum áfanga og samtalinu við ríkisvaldið um þessa mikilvægu þjónustu.
Í bæjarráði var þennan sama dag samþykkt að hækka frístundaávísanir fyrir börn og eldri borgara frá 1. ágúst 2023. Frístundaávísun fyrir fyrsta og annað barn verði kr. 57.000 og kr. 65.500 fyrir þrjú börn eða fleiri. Þá verði frístundaávísun eldri borgara kr. 11.000.
Á sama fundi var samþykkt tilboð fyrirtækisins Múr og málningaþjónusta í glugga í Kvíslarskóla, rúmlega 114 mkr. Útboðið var opið og skiluðu 6 verktakar inn tilboði.
Á fundinum var einnig samþykkt að staða framkvæmdastjóra fræðslu- og frístundasviðs yrði ekki auglýst fyrr en að lokinni stjórnsýsluúttekt sem fer fram í janúar til mars á þessu ári. Linda Udengaard framkvæmdastjóri sviðsins hefur beðist lausnar úr starfi þar sem hún tekur við starfi framkvæmdastjóra fræðslu- og menningarsviðs Garðabæjar í febrúar næstkomandi. Gunnhildur Sæmundsdóttir mun gegna starfinu þar til nýr framkvæmdastjóri verður ráðinn.
Jólin voru með rólegasta móti en það þurfti að ryðja götur fram eftir degi á aðfangadag og halda helstu stofnleiðum og tengileiðum opnum á jóladag. Okkar menn stóðu vaktina undir forystu Bjarna Ásgeirssonar en á forsíðumyndinni að þessu sinni er mynd af Bjarna þegar hann leit við í þjónustuveri bæjarins. Tíkin Míla er með honum á mynd ásamt eigandanum, Gúnda, sem sinnir meindýravörnum fyrir Mosfellsbæ með dyggri aðstoð Mílu. Á myndinni eru einnig okkar góðu starfsmenn í þjónustuverinu, þær Hafdís Óskarsdóttir, Sædís Pálsdóttir og Dagný Símonardóttir ásamt Marco Pizzpolato á umhverfissviði.
Starfsmenn Mosfellsbæjar fengu jólagjöf frá bænum í ár, eins og undanfarin ár og var það gjafakort á veitingahúsakeðju. Andvirði kortsins er 15 þúsund krónur. Með gjöfinni vill Mosfellsbær sýna þakklæti fyrir afar vel unnin störf á árinu. Bæjarfulltrúar fengu einnig jólagjöf, bókina Hersetan í Mosfellssveit og á Kjalarnesi 1940 – 1944 eftir Friðþór Eydal. Það er Sögufélag Kjalarnesþings sem gefur bókina út. Fjöldi breskra hermanna höfðust við í Mosfellbæ á þessum árum sem hafði áhrif á lífið í bæjarfélaginu. Hægt er að nálgast bókina hjá Héraðsskjalasafni Mosfellsbæjar.
Það var aðeins tvísýnt um áramótabrennuna vegna óvissustigs almannavarna á gamlársdag en lægðin sveigði suður af landinu sem betur fer og allt var með kyrrum kjörum veðurfarslega séð.
Ég sótti nýársdagsboð forseta sunnudaginn 1. janúar í stilltu og fallegu veðri. Það er hefð fyrir því að forsetinn bjóði helstu embættismönnum þjóðarinnar, bæjarstjórum stærstu sveitarfélaganna og fulltrúum sjálfboðasamtaka í nýársboðið sem hefur á sér mjög hátíðlegan blæ.
Tveir nýir starfsmenn hófu störf á bæjarkrifstofunni þann 2. janúar. Það eru þær Sif Sturludóttir sem kom til starfa sem leiðtogi upplýsingastjórnunar og Lukka Berglind Brynjarsdóttir ráðgjafi á velferðarsviði.
Sif mun gegna lykilhlutverki í stafrænni umbreytingu Mosfellsbæjar og vinna þvert á starfsemina að umbótum þjónustuferla og leiða vinnu við varðveislu upplýsinga og gagna Mosfellsbæjar.
Hún kemur til okkar frá Sýn þar sem hún starfaði sem forstöðumaður verkefnastofu og innri reksturs. Þar hefur hún stýrt faglegri verkefnastýringu þvert á svið, deildir og skipulag. Ennfremur bar hún ábyrgð á rekstri fasteigna, innkaupum og samfélagslegri ábyrgð fyrirtækisins. Menntun Sifjar er B.Ed. frá Háskóla Íslands og MPM frá Háskólanum í Reykjavík.
Lukka er þroskaþjálfi að mennt og er ráðin inn sem ráðgjafi á velferðarsviði og mun þar sinna málefnum fatlaðs fólks (barna og fullorðinna) sem og ráðgjöf vegna annarra barna sem koma í þjónustu sviðsins.
Hún er þroskaþjálfi að mennt og hefur starfað í Krikaskóla frá árinu 2010 þar sem hún hefur starfað með fötluðum nemendum sem og öðrum nemendum með sérþarfir. Áður en hún réði sig til Krikaskóla starfaði hún á leikskólanum Huldubergi í tvö ár.
Ég lauk vinnuvikunni á fundi með forsvarsmönnum fyrirtækisins Strategíu, þeim Guðrúnu Ragnarsdóttur og Helgu Hlín Hákonardóttur þar sem við lögðum línurnar um þær vinnustofur sem eru fyrirhugaðir vegna úttektarinnar. Meðal annars íbúafund sem verður haldinn í byrjun febrúar.
Í dag er þrettándinn og nú á eftir verður haldin vegleg brenna neðan Holtahverfis við Leiruvoginn. Skátafélagið Mosverjar leiðir blysför frá Miðbæjartorginu kl. 17:30. Dagskráin verður fjölbreytt en fram koma Stormsveitin og Skólahljómsveit Mosfellsbæjar. Álfakóngur og álfadrottning, Grýla og Leppalúði verða á svæðinu og björgunarsveitin Kyndill verður með glæsilega flugeldasýningu.
Veðrið er gott til útivistar og ég óska ykkur góðrar skemmtunar – og helgar!
Regína Ásvaldsdóttir
Mynd 1: Útskriftarnemendur framhaldsskólans í Mosfellsbæ 2022
Mynd 2: Valgarður Már Jakobsson skólameistari
Mynd 3: Bessastaðir 1. janúar
Mynd 4: Sif og Lukka fyrsta vinnudaginn
