Aðalinnritun vegna úthlutunar leikskólaplássa fyrir skólaárið 2025 – 2026 gengur mjög vel í Mosfellsbæ. Umsóknir sem bárust fyrir 1. mars 2025 hafa verið afgreiddar og öll börn sem verða 12 mánaða eða eldri þegar aðlögun hefst hafa fengið úthlutað leikskólaplássi. Auk þess verður unnið úr þeim umsóknum sem berast jafn óðum fram að sumarleyfi leikskóla. Umsóknir sem berast eftir sumarleyfi verða teknar til vinnslu og áhersla lögð á að koma til móts við foreldra.
Nýr leikskóli sem hefur fengið nafnið Sumarhús og er staðsettur við Vefarastræti í Helgafellshverfi opnar í lok sumars. Gert er ráð fyrir um 150 börnum þar og mun skólinn vinna eftir heilsustefnu þar sem heilsa og vellíðan nemenda, starfsfólks og samfélagsins alls er í forgrunni í tengslum við leik og sköpun.
