Tækjum sem sinna mokstri stofn- og tengibrauta hefur verið fjölgað til þess að auka og bæta vetrarþjónustu og ætti mokstri á þeim leiðum að vera lokið fyrir kl. 8:00 á morgnana. Einnig hefur tækjum sem sinna mokstri á bílaplönum stofnana og í helstu húsagötum verið fjölgað.
Hálkuvarnir og mokstur helstu húsagatna verða metnar hverju sinni af eftirlitsvakt og farið í fyrirbyggjandi aðgerðir og hálkuvarnir þannig að snjór safnist ekki upp og myndi klakabrynjur. Viðmið um snjómagn í húsagötum sem miðaðist áður við 15 cm snjódýpt miðast nú við 10 cm snjódýpt.
Þjónustustöð Mosfellsbæjar sér um mokstur og hálkueyðingu á öllum stígum bæjarins og helstu gangstéttum í hverfum þar sem hægt er að koma því við. Allt stígakerfi bæjarins er í fyrsta forgangi og er miðað við að snjó og hálkueyðingu sé lokið fyrir kl. 7:30. Sérstök áhersla er lögð á allt stígakerfi til og frá skólum og íþróttamannvirkjum og einnig að svokallaður samgöngustígur sé að öllu jöfnu alltaf fær hjólandi og gangandi umferð.
