Bæjarráð Mosfellsbæjar hefur samþykkt að hefja úthlutun lóða í 5. áfanga Helgafellshverfis. Á svæðinu hafa verið skipulagðar 151 íbúðir sem mynda blandaða byggð í hlíð á móti suðri.
Byggingarrétti lóða við Úugötu verður úthlutað í tveimur hlutum á grunni úthlutunarskilmála sem lýsa fyrirkomulagi úthlutunar, verðlagningu og tímasetningum. Í fyrri úthlutun er óskað eftir tilboðum í byggingarrétt annars vegar fjögurra fjölbýla með 12 íbúðum hvert, alls 48 íbúðir, og hins vegar sjö raðhúsa, alls 24 íbúðir. Tveimur fjölbýlishúsum við Úugötu 10-12, alls 24 íbúðir, verður úthlutað til Bjargs íbúðafélags og lóðinni Úugötu 1 verður úthlutað til Þroskahjálpar undir fimm íbúða íbúðakjarna fyrir fatlaða.
Fyrri hluti úthlutunarinnar verður auglýstur á næstu vikum á vef Mosfellsbæjar og dagblöðum.
Áformað er að síðari úthlutun lóða á svæðinu, sem eru að mestu einbýlishúsa- og parhúsalóðir, eigi sér stað í september 2023. Nánari upplýsingar varðandi þá úthlutun verða auglýstar síðar.
Úthlutunarreglur samþykktar
Í úthlutunarreglunum verða skilyrði fyrir úthlutun tíunduð. Lóðunum verður úthlutað á grundvelli tilboðs í byggingarrétt hverrar lóðar en lágmarksverð verður lagt til grundvallar og tilboðum sem eru lægri en lágmarksverð verður hafnað.
Bæði einstaklingar og lögaðilar geta lagt fram tilboð í byggingarrétt lóða en hver umsækjandi getur þó aðeins lagt fram eitt tilboð í hverja lóð. Umsækjendur þurfa að uppfylla skilyrði um fjárhagslegt hæfi sem tilgreind eru í 3. gr. úthlutunarreglna Mosfellsbæjar.
Fyrirspurnir má senda á mos@mos.is.
Tengt efni
Úthlutun lóða við Fossatungu og Langatanga lokið
Tilboð opnuð í byggingarrétt lóða við Langatanga og Fossatungu
Bæjarráð opnaði tilboð í byggingarrétt lóða við Langatanga og Fossatungu á 1606. fundi sínum í morgun 14. desember.
Tilboð í lóðir við Fossatungu og Langatanga opnuð 14. desember 2023
Tilboð verða opnuð og tekin fyrir á fundi bæjarráðs Mosfellsbæjar kl. 07:30 fimmtudaginn 14. desember 2023.