Pist­ill bæj­ar­stjóra 2. des­em­ber 2022

Gleði­lega að­ventu!

Fyrsti laug­ar­dag­ur í að­ventu var ein­stak­lega góð­ur dag­ur þar sem veðr­ið lék við okk­ur hér í Mos­fells­bæ og setti fal­leg­an ramma utan um há­tíð­ar­höld­in á mið­bæj­ar­torg­inu. Ég hóf dag­inn í  Lága­fells­kirkju, þar sem Li­ons­klúbb­ur Mos­fells­bæj­ar og Li­ons­klúbbur­inn Úa voru með dagskrá í tengsl­um við af­hend­ingu fjár­fram­lags til hjálp­ar­starfs Lága­fells­sókn­ar. Það var gott að koma í þessa fal­legu kirkju og það náð­ist mjög góð stemn­ing á þess­um við­burði.

Bragi Ragn­ars­son fór yfir sögu  Li­ons­klúbbs Mos­fells­bæj­ar og sagði frá bygg­ingu fyrsta áfanga dval­ar­heim­il­is­ins (nú hjúkr­un­ar­heim­ili) hér í bæ. Lík­lega stærsta verk­efni sem nokk­ur klúbb­ur hef­ur ráð­ist í.  Pen­inga­söfn­un til verk­efn­is­ins hófst upp úr 1970 og fyrsta skóflu­stung­an var tekin 26. nóv­em­ber 1976.  Hús­ið var af­hent Mos­fells­bæ þann 12. júlí 1980 og árið eft­ir  unnu klúbb­fé­lag­ar við  stand­setn­ingu lóð­ar­inn­ar um­hverf­is hús­ið.

Ég hélt er­indi um fá­tækt og þá að­al­lega með áherslu á líð­an þeirra barna og ung­menna sem glíma við þær að­stæð­ur í upp­vext­in­um og áhrif þess á sál­ar­líf­ið. Signý Sig­tryggs­dótt­ir frá Li­ons­klúbbn­um Úu var með pist­il um starf­ið í klúbbn­um og þau Þor­steinn Yngvi Magnús­son og Ida Fenger af­hentu svo séra Arn­dísi sókn­ar­presti  fjár­fram­lag í hjálp­ar­sjóð kirkj­unn­ar.

Við feng­um tón­list­ar­at­riði úr Lista­skóla Mos­fells­bæj­ar og þar á með­al frá Evu Limbo Guð­munds­dótt­ur sem spil­aði und­ur­fallega á pí­anó en hún prýð­ir  for­síðu­mynd­ina í dag.

Að­ventu­há­tíð­in á mið­bæj­ar­torg­inu var ekki síð­ur fal­leg og þar kom Lista­skól­inn aft­ur við sögu en börn úr for­skóla­deildinni, undir stjórn Þór­unn­ar Díu Stein­dórs­dótt­ur sungu og spil­uðu fyr­ir gest­i. Það voru síðan þau Anney Saga La Marca Woodrow og Pálm­ar Jósep Gylfa­son á leik­skól­an­um Reykja­koti sem fengu heið­ur­inn að því að tendra ljós­in á jólatrénu og ég aðstoðaði þau lítillega við það verkefni.

Venju sam­kvæmt kíktu jóla­svein­ar í heim­sókn og gáfu mandarín­ur auk þess sem Mos­fell­ing­ur­inn Jógv­an Han­sen stýrði samkomunni og flutti nokk­ur lög. Þetta var í fyrsta skipt­ið síð­an 2019 sem ljós­in voru form­lega tendr­uð og ánægju­legt að sjá hversu marg­ir sóttu við­burð­inn.

Fyr­ir tendr­un­ina spil­aði Skóla­hljóm­sveit Mos­fells­bæj­ar und­ir stjórn Daða Þórs Ein­ars­son­ar jóla­lög á torg­inu í Kjarna þar sem 4. flokk­ur kvenna í fót­bolta hjá Aftureldingu seldi vöffl­ur, kakó og kaffi í fjár­öfl­un­ar­skyni.

Í vikunni átti ég fjölmarga fundi að vanda, í stjórn slökkviliðs höfuðborgarsvæðisins, bæjarráði og fræðslunefnd auk fastra funda með starfsmönnum. Ég fundaði með stjórnarformanni og framkvæmdastjóra Sorpu vegna undirbúnings að fundi stefnuráðs um eigendastefnu Sorpu. Ennfremur sótti ég fund með borgarstjóra vegna sama málefnis. Á síðasta kjörtímabili var ákveðið að setja á laggirnar stefnuráð fyrir höfuðborgarsvæðið en hlutverk þess er að taka stefnumótandi ákvarðanir um þau verkefni sem sveitarfélögin á höfuðborgarsvæðinu standa sameiginlega að s.s. sorpurðun og strætisvagnasamgöngur.

Í stefnuráðinu eru bæjarstjórar og borgarstjóri ásamt kjörnum fulltrúum úr meiri og minnihluta. Formennska í stefnuráðinu er sameiginleg á milli  formanns  SSH og borgarstjóra og því fellur það í minn hlut að undirbúa fundi stefnuráðsins í samvinnu við borgarstjóra Reykjavíkur. Fulltrúar Mosfellbæjar í stefnuráðinu þetta kjörtímabilið eru Lovísa Jónsdóttir og Ásgeir Sveinsson.

Ég sótti fund fræðslunefndar sem fjallaði um starfsumhverfi leikskólanna í Mosfellsbæ. Gestir fundarins auk mín voru Tinna Rúna Eiríksdóttir, Sveinbjörg Davíðsdóttir, Þrúður Hjelm, Kristlaug Þ. Svavarsdóttir og Guðrún Björg Pálsdóttir leikskólastjórar í Mosfellsbæ auk þess sem Þuríður Stefánsdóttir sem á fast sæti sem áheyrnarfulltrúi í ráðinu fyrir hönd leikskólstjóranna sat einnig fundinn.

Þrúður Hjelm var með mjög áhugaverða kynningu á helstu áskorunum sem leikskólastjórar standa frammi fyrir þeg­ar kem­ur að því að manna stöð­ur og bjóða upp á að­lað­andi starfs­um­hverfi í leik­skól­um á sama tíma og leik­skóla­börn­um fjölg­ar og kraf­an um fag­lega þjón­ustu eykst. Þrúður kom með mjög margar gagnlegar ábendingar sem lúta að verkefnum leikskólastjóra í tengslum við rekstur, mannauðsmál og umsjón með húsnæði. Fræðslu­nefnd fól fram­kvæmda­stjóra fræðslu- og frí­stunda­sviðs að taka um­ræð­una áfram með það að markmiði að finna lausn­ir, bæði með mið­læg­um hætti og einnig með sér­tæk­um hætti í hverj­um og ein­um skóla.

Ég átti líka fund í stýrihópi um börn með fjölþættan vanda en í honum eiga sæti fulltrúar þriggja ráðuneyta, Barna og fjölskyldustofu og Sambands íslenskra sveitarfélaga.  Vinnan hefur snúist um að móta sameiginlegar tillögur um úrræði fyrir börn og unglinga sem glíma við mikinn heilbrigðis- og hegðunarvanda. Tillögurnar eru komnar vel á veg og eigum við von á að geta afhent mennta-og barnamálaráðherra niðurstöður í lok þessa árs.

Ég tók líka nokkra fundi með einstaklingum og fyrirtækjum, vegna ýmissa mála sem tengjast verkefnum sveitarfélagsins en ég er með opna viðtalstíma þar sem fólk getur pantað tíma. Oft er um að ræða málefni sem hafa komið inn á borð stjórnsýslunnar áður eða eru í öðru ferli innan kerfisins. Mosfellsbær er í þeirri stöðu, eins og flest önnur sveitarfélög að íbúum finnast málin ganga hægt í gegnum kerfið.  Það er einmitt eitt af hlutverkum þeirrar stjórnsýsluúttektar sem er fyrirhuguð, að fara í gegnum ferlana og skoða hvar má stytta málsmeðferðartíma meðal annars með því að auka stafræna getu sveitarfélagsins. Síðasti fundur vikunnar var einmitt með Guðrúnu Ragnarsdóttur frá fyrirtækinu Strategíu en bæjarráð fól mér að ganga til viðræðna við fyrirtækið vegna úttektarinnar. Það voru tvö fyrirtæki sem sendu inn tilboð og Strategía varð fyrir valinu.

Að þessu sögðu óska ég ykkur góðrar helgar!

Regína Ásvaldsdóttir