Mosfellsbær fagnar opnun nýs og glæsilegs leikskóla í Helgafellslandi sem fengið hefur nafnið Sumarhús. Opnun leikskólans er stór og mikilvægur áfangi í bættri þjónustu við börn og fjölskyldur í sveitarfélaginu. Leikskólinn er sérstaklega hannaður og byggður með þarfir barna og starfsfólks að leiðarljósi.
„Þessi dagur markar mikilvæg tímamót fyrir Mosfellsbæ, afhending og vígsla nýs og glæsilegs leikskóla. Við erum einstaklega ánægð með samvinnu við verktakafyrirtækið Alefli sem hefur staðið við allar tímasetningar og skilar af sér glæsilegu verki.
Með opnun Sumarhúsa er stigið stórt og mikilvægt skref í að fjölga leikskólarýmum og efla þjónustu við yngstu íbúa bæjarins og halda þannig áfram að gefa börnum allt frá 12 mánaða aldri kost á leikskólaplássi“ segir Regína Ásvaldsdóttir bæjarstjóri.
150 leikskólapláss í Sumarhúsum
Leikskólinn Sumarhús er fyrir börn á aldrinum 1–5 ára og rúmar 150 börn. Frá hausti munu um 60 börn ásamt starfsfólki frá leikskólanum Hlaðhömrum dvelja þar tímabundið á meðan unnið er að framtíðarlausn fyrir Hlaðhamra sem varð að loka í vetur vegna skemmda á húsnæði.
Leikskólastjóri Sumarhúsa er Berglind Grétarsdóttir. Starfsmenn verða um 45 talsins í 40 stöðugildum og vel hefur gengið að ráða í helstu lykilstöður í leikskólanum.
Heilsustefnan verður leiðarljós skólastarfsins
Starf Sumarhúsa byggir á Heilsustefnunni, þar sem áhersla er lögð á næringu, hreyfingu og sköpun í leik.
„Við hlökkum mikið til að taka á móti þeim börnum sem hefja skólagöngu sína í Sumarhúsum að loknu sumarleyfi. Jafnframt verður spennandi að sjá starfið þróast og dafna og leikskólann verða einn af máttarstólpunum í skólasamfélagi Mosfellsbæjar“ segir Berglind Grétarsdóttir leikskólastjóri í Sumarhúsum.
Glæsilegt nýtt húsnæði Sumarhúsa
Sumarhús er í nýju og sérhönnuðu húsnæði í Helgafellslandi sem er í senn bjart, nútímalegt og vistvænt. Hugmyndafræðin að baki hönnun húsnæðisins er að leikskólinn verði hagkvæmur í rekstri, að hljóðvist, lýsing og loftgæði verði sem best og byggingin í heild sinni falli þannig að umhverfi sínu að auðvelt sé að tengja saman skólastarf, náttúru, umhverfi og samfélag.
Kanon arkitektar sáu um hönnun hússins og var vinnan leidd af arkitektunum Halldóru Kristínu Bragadóttur og Mofellingnum Þorkeli Magnússyni. Verkfræðihönnun var í höndum Teknik ehf. og VSÓ ráðgjöf sá um byggingastjórnun. Mosfellska verktakafyrirtækið Alefli ehf. sá um byggingu leikskólans og gekk vinnan það vel að verktakinn skilaði húsnæðinu af sér fyrir áætluð verklok.
Á efstu mynd eru frá vinstri: Berglind Grétarsdóttir leikskólastjóri Sumarhúsa, Regína Ásvaldsdóttir bæjarstjóri, Magnús Þór Magnússon framkvæmdastjóri Aleflis,
Aldís Stefánsdóttir bæjarfulltrúi og formaður fræðslu- og frístundaráðs, og Sveinbjörg Davíðsdóttir leikskólastjóri Hlaðhamra.
Ljósmyndari: Helga Dögg Reynisdóttir
