Þann 7. maí undirrituðu borgarstjórinn í Reykjavík og bæjarstjórar Mosfellsbæjar, Seltjarnarness, Kópavogs, Garðabæjar og Hafnarfjarðar samkomulag sveitarfélaganna um endurnýjun og uppbyggingu mannvirkja skíðasvæða höfuðborgarsvæðisins í Bláfjöllum og Skálafelli.
Samkomulagið byggir á grundvelli framtíðarsýnar sem verkefnahópur vegna uppbyggingar skíðasvæðanna á vegum Samtaka sveitarfélaga á höfuðborgarsvæðinu hefur markað. Forgangsverkefni þeirrar framtíðarsýnar eru að hefja snjóframleiðslu og bæta lyftubúnað í Bláfjöllum og í Skálafelli.
Gert er ráð fyrir því að uppbyggingartímabilin verði tvö, annars vegar frá 2019-2024 með árið 2018 sem undirbúningstímabil. Seinni hluti tímabilsins tæki yfir árin 2025-2030. Á fyrra tímabilinu er lagt til að áherslan verði á snjóframleiðslu og lyftubúnað og að framkvæmdum við þau verkefni verði lokið árið 2024.
Í meðförum innan stjórnar Samtaka sveitarfélaga á höfuðborgarsvæðinu var tekin ákvörðun um að flýta framkvæmdum við endurnýjun stólalyftu í Skálafelli. Bæjarráðs Mosfellsbæjar heimilaði þann 12. apríl sl. bæjarstjóra að undirrita samning um ofangreindar framkvæmdir á tímabilinu 2019-2024 að því gefnu að ráðist yrði í endurnýjun lyftu í Skálafelli eigi síðar en árið 2020.
„Það er ánægjulegt að þessi metnaðarfulla framtíðarsýn fyrir skíðasvæðin tvö hafi verið mörkuð og að sveitarfélögin á höfuðborgarsvæðinu hafi burði til þess að ráðast í þessa mikilvægu en kostnaðarsömu vinnu við að umbylta aðstæðum til að stunda þá fjölskylduíþrótt sem skíðaíþróttin er. Þetta er mikilvægt verkefni á sviði heilsueflingar og Skálafellið er að mínu mati lykill að því að ná árangri við að styrkja rekstur skíðasvæðanna þar sem veður og aðstæður geta verið ólík milli svæðanna tveggja og því gott að geta miðlað fólki á milli þeirra eftir aðstæðum. Þá er Skálafellið líka skíðasvæðið okkar Mosfellinga.“ segir Haraldur Sverrisson, bæjarstjóri Mosfellsbæjar.