Á afmælisdag Halldórs Laxness þann 23. apríl verður menningardagskrá á bókasafni Mosfellsbæjar.
Dagskráin er liður í Menningarvori sem er haldið nú í fjórða sinn. Nú þegar hafa verið haldin tékkneskt og franskt kvöld sem voru mjög vel sótt. Þykir við hæfi að enda á íslensku kvöldi til heiðurs Íslandssögunum og Halldóri Laxness.
Óttar Guðmundsson geðlæknir sem er orðin þekktur fyrir greiningar sínar á persónum Íslendingasagnanna mun koma og segja frá niðurstöðum sínum. Meðal annars af Agli Skallagrímssyni sem dvaldi í Mosfellsdal síðustu ævidaga sína og mun þar hafa falið silfur sitt eins og frægt er orðið. Fyrir þá sem ekki vita þá er skjaldarmerki Mosfellsbæjar tilvísun í silfur Egils og eiga Mosfellingar því nokkurt tilkall til þeirrar sögu.
Þóra Einarsdóttir söngkona ætlar að syngja lög Jóns Þórarinssonar, Jóns Ásgeirssonar og Jórunnar Viðar við kvæði Halldórs Laxness en undirleikari verður Helga Bryndís Magnúsdóttir.
Dagskráin byrjar kl. 20:00, að venju er aðgangur ókeypis og öll velkomin á Bókasafnið.
Tengt efni
Lína Langsokkur mætti óvænt á sögustund
Það vakti mikla lukku í gær þegar Lína Langsokkur, Hr. Níels, Anna og Keli mættu óvænt á sögustund í Bókasafni Mosfellsbæjar.
Safnanótt 2023 með pompi og pragt
Safnanótt var haldin hátíðleg í Bókasafni Mosfellsbæjar föstudaginn 3. febrúar.
Vel heppnað Bókmenntahlaðborð eftir tveggja ára hlé
Bókmenntahlaðborð Bókasafns Mosfellsbæjar var haldið þriðjudaginn 22. nóvember, eftir tveggja ára hlé sökum Covid-19 heimsfaraldursins.