Fullt var út úr dyrum á Bókmenntahlaðborði Bókasafnsins í ár og met slegið í fjölda gesta eða um 360 manns.
Kolbeinn Tumi Haraldsson lék ljúfa tóna á flygilinn meðan fólk beið eftir að veislan hæfist. Katrín Jakobsdóttir bókmenntafræðingur stjórnaði umræðum af sinni alkunnu snilld en það hefur hún gert sl. 12 ár. Hún hafði á orði að um tíma var hún alltaf ófrísk en undanfarin ár stöðugt í stjórnarmyndunarviðræðum.
Rithöfundar kvöldsins voru Bjarki Bjarnason með minningabók Guðrúnar Tómasdóttur söngkonu; Söngurinn og sveitin, Bubbi með ljóðabókina Hreistur, Jón Kalman Stefánsson með skáldsöguna Saga Ástu, Lilja Sigurðardóttir með glæpasöguna Búrið og Vilborg Davíðsdóttir með bókina Blóðug jörð. Rithöfundar lásu úr verkum sínum og ræddu um tilurð þeirra og inntak. Þá tók Katrín saman þá þræði sem henni fannst liggja í þessum bókum um sterkar konur og urðu úr því góðar umræður.
Gestir skemmtu sér vel og nutu góðra bókmennta og veitinga í notalegu umhverfi Bókasafnsins.
Tengt efni
Menning í mars í Kjarna laugardaginn 22. mars 2025
Blómlegir tímar í Kósí Kjarna
Menningin í Mosfellsbæ lyftir upp andanum í mars
Menning í mars hefur það að markmiði að efla menningarstarf í bænum, gera það sýnilegra og styðja þau sem að því standa við að kynna sig.
