Úrslit í kjöri íþróttakonu og íþróttakarls Mosfellsbæjar voru tilkynnt í verðlaunahófi sem fram fór í Íþróttamiðstöðinni að Varmá í gær að viðstöddu fjölmenni.
Íris Eva Einarsdóttir skotfimikona úr Skotfélagi Reykjavíkur var kjörin Íþróttakona Mosfellsbæjar 2015.
Íris Eva var sigurvegari í öllum innanlandsmótum í loftriffli kvenna sem haldin voru á árinu ásamt því að ná meistaraflokksárangri á á öllum mótum. Íris Eva náði ólympíulágmörkum í greininni fékk gullverðlaun Reykjavíkurleikunum 2015, og vann til gullverðlauna á smáþjóðaleikunum sem haldnir voru í Reykjavík. Hún varð íslands- og bikarmeistari á árinu. Íris Eva er númer 241 á styrkleikalista Alþjóða skotsambandsins.
Reynir Örn Pálmason hestaíþróttamaður úr Hestamannafélaginu Herði var kjörin íþróttakarl Mosfellsbæjar 2015.
Árið 2015 var besta keppnisár Reynis frá upphafi. Þar bar hæst heimsmeistaratitill á gríðarsterku móti í Henning í Danmörku og tvenn silfurverðlaun sem var besti árangur einstakra á öllu mótinu. Reynir var tvöfaldur íslandsmeistari í samanlögðum fimmgangsgreinum og í slaktaumatölti, þar sem hann hlaut hæstu einkunn 8,88. Reynir er mjög ofarlega á heimslistum FEIF World-ranking 2015 sem eru heimssamtök Íslandshesta.
Alls voru tilnefndar níu konur til kjörs íþróttakonu Mosfellsbæjar og átta karlar til kjörs íþróttakarls Mosfellsbæjar frá fimm íþróttafélögum. Einnig voru veittar 105 viðurkenningar fyrir íslands-, bikar-, landsmóts- og deildarmeistaratitla og 96 viðurkenningar fyrir þátttöku og æfingar með landsliðum íslands ásamt því að heiðra efnileg ungmenni 16 ára og yngri í hverri íþróttagrein.
Við sama tækifæri var Sigrúnu Þ. Geirsdóttir sundafrekskonu veit sérstök heiðursviðurkenning fyrir þann frábæra árangur að vera fyrst íslenskra kvenna synda yfir Ermasundið 62,7 km á 22 og hálfri klukkustund. Þess má einnig geta að Sigrún Þ. Geirsdóttir er Mosfellingur ársins eftir árlega útnefningu bæjarblaðsins Mosfellings.
Mynd frá vinstri: Haraldur Sverrisson, bæjarstjóri, Íris Eva Einarsdóttir, skotfimikonan, Reynir Örn Pálmason, hestaíþróttamaður, Hafsteinn Pálsson, forseti bæjarstjórnar og Ólafur Rafn Snorrason, formaður íþrótta og tómstundanefndar.
Ljósmyndari: Raggi Óla, Mosfellingur
Tengt efni
Íþróttafólk Mosfellsbæjar 2023 heiðrað við hátíðlega athöfn í Hlégarði fimmtudaginn 11. janúar
Tilnefningar voru 21 og eins og áður gafst bæjarbúum kostur á, ásamt íþrótta- og tómstundanefnd, að kjósa úr hópi tilnefndra íþróttafólk ársins 2023. Á sama tíma var þjálfari, lið og sjálfboðaliði ársins heiðruð.
Kjör íþróttafólks Mosfellsbæjar 2023
Átta konur og ellefu karlar hafa verið tilnefnd af íþrótta- og tómstundanefnd Mosfellsbæjar til íþróttafólks Mosfellsbæjar 2023.
Tilnefningar til íþróttafólks Mosfellsbæjar 2023 - Hægt að senda inn tilnefningar til 24. nóvember
Hægt er að senda inn tilnefningar til 24. nóvember.
