Sam­ráð við ung­mennaráð í fram­haldi af for­eldra­fundi í Hlé­garði

Nýtt ung­mennaráð fyr­ir vet­ur­inn 2024-2025 fund­aði á bæj­ar­skrif­stof­um í síð­ustu viku þar sem þau ræddu með­al ann­ars vel­ferð ung­menna í Mos­fells­bæ við Regínu Ás­valds­dótt­ur bæj­ar­stjóra og Ólafíu Dögg Ás­geirs­dótt­ur skrif­stofu­stjóra um­bóta og þró­un­ar.

Sam­tal­ið teng­ist þeirri vinnu sem bæj­ar­yf­ir­völd ákváðu að hefja í kjöl­far stöð­un­ar sem kom upp í tengsl­um við bæj­ar­há­tíð­ina Í Tún­inu heima og um­ræð­unn­ar í sam­fé­lag­inu und­an­far­ið. Hluti af þeirri vinnu var op­inn fund­ur þann 17. sept­em­ber síð­ast­lið­inn með for­eldr­um og for­sjár­að­il­um eldri bekk­inga í grunn­skól­um bæj­ar­ins und­ir yf­ir­skrift­inni „Það þarf heilt þorp til að ala upp barn”. Áherslu­mál fund­ar­ins var hvern­ig for­eldr­ar og Mos­fells­bær gætu stutt við og auk­ið vel­ferð og ör­yggi barna. Mjög marg­ar hug­mynd­ir og ábend­ing­ar komu frá for­eldr­um og var ákveð­ið að fylgja þeim eft­ir með fundi með ung­menna­ráði til að ræða sömu mál.

Ung­mennaráð fékk sömu spurn­ing­ar og for­eld­ar/for­sjár­að­il­ar fund­ar­ins og sköp­uð­ust góð­ar um­ræð­ur og voru marg­ar góð­ar hug­mynd­ir sem komu fram. Mik­ill sam­hljóm­ur reynd­ist vera milli svara for­eldra og full­trúa í ung­menna­ráði. Hvað snýr að for­eldr­um þá var áhersla ung­menna­ráðs á sam­veru, góð sam­skipti og hafa skýr­an ramma í kring­um úti­vist­ar­tíma, tölv­ur o.s.frv. Það sem snýr að Mos­fells­bæ er upp­lýs­inga­gjöf, fræðsla og að skapa tæki­færi til sam­veru.

Mos­fells­bær vinn­ur að gerð að­gerða­áætl­un­ar og for­gangs­röð­un­ar verk­efna í tengsl­um við bók­un bæj­ar­stjórn­ar þann 28. ág­úst síð­ast­lið­inn sem var svohljóð­andi:

Ábend­ing­ar og hug­mynd­ir ung­menna­ráðs og for­eldra verða nýtt­ar í þeirri vinnu ásamt vinnu sér­fræð­inga í mál­efn­um barna og ung­menna á vel­ferð­ar­sviði og fræðslu- og frí­stunda­sviði.