Dagana 16. – 22. september mun Mosfellsbær taka þátt í Evrópsku Samgönguvikunni, European Mobility Week.
Tilgangur samgönguvikunnar er að vekja athygli á vistvænum samgöngum og hvetja almenning til að nýta sér almenningssamgöngur, hjólreiðar og aðra vistvæna fararkosti.
Mosfellsbær hefur verið virkur þátttakandi í samgönguvikunni undanfarin ár og staðið fyrir margs konar viðburðum í tilefni vikunnar, bæði í Mosfellsbæ og víðs vegar á höfuðborgarsvæðinu í samstarfi við nágrannasveitarfélögin.
Mosfellsbæ vill vekja sérstaklega athygli á tveimur viðburðum í Mosfellsbæ í samgönguvikunni.
Hjólreiðaráðstefna í Hlégarði
Mosfellsbær mun í ár hýsa stóra hjólreiðaráðstefnu, Hjólum til framtíðar þar sem áhersla verður sett á hjólreiðar í náttúrunni. Ráðstefnan verður haldin í Hlégarði föstudaginn 16. september kl. 10-16. Nánari upplýsingar um ráðstefnuna má finna á vef Landsamtaka hjólreiðamanna og þar er hægt að skrá sig til þátttöku.
Fyrir ráðstefnuna verður boðið upp á hjólreiðaferð frá Elliðaárvogi (við hjólabrýr) til Mosfellsbæjar þar sem m.a. verður hjólað á nýja samgöngustígnum undir Úlfarsfelli. Lagt verður af stað kl. 9 frá Elliðaánum og kl. 9:20 frá bílastæðinu við Bauhaus fyrir þá sem vilja slást í hópinn.
Ný hjólahreystibraut á miðbæjartorgi
Mosfellsbær í samvinnu við LexGames munu setja upp nýja hjólahreystibraut, Pump track braut, á miðbæjartorginu á meðan á samgönguvikunni stendur. Brautin hentar jafnt BMX hjólum, reiðhjólum, hlaupahjólum, hjólabrettum og línuskautum. Að samgönguvikunni lokinni verður brautin flutt á sinn varanalega stað við litla gervigrasvöllinn við íþróttamiðstöðina við Varmá.
Af öðrum viðburðum má nefna:
- BMX landsliðið kemur í heimsókn og sýnir listir sínar á miðbæjartorginu
- Dr. Bæk mætir í bæinn og aðstoðar við reiðhjólastillingar
- Bíllausi dagurinn er 22. september en þá er almenningur hvattur til að skilja bílinn eftir heima og nýta sér aðra samgöngumáta
Mosfellsbær mun í tilefni vikunnar einnig vekja athygli á göngu- og hjólastígakortum bæjarins og gera þau aðgengileg á vefnum og á helstu þjónustustöðum í bænum, auk þess sem skólarnir í Mosfellsbæ og forsvarsmenn skólabarna eru hvattir til að taka virkan þátt í samgönguvikunni með því að skilja bílinn eftir heima.
Tengt efni
Vaskir hjólagarpar tóku þátt í BMX hátíð
Hráslagalegt veður stöðvaði ekki vaska hjólagarpa í gær þegar BMX-BRÓS stóðu fyrir BMX-hátíð á Miðbæjartorgi í tengslum við Samgönguviku.
Samgönguvika 16. - 22. september 2023
Við í Mosfellsbæ erum virkir þátttakendur í Samgönguviku og eftirfarandi verður í boði í Mosfellsbæ í vikunni.
Bíllausi dagurinn 22. september 2022
Í dag er bíllausi dagurinn en á þeim degi eru íbúar hvattir til að skilja bílinn eftir heima og nýta sér frekar vistvæna samgöngumáta sé þess kostur.
