Bæjarráð hefur samþykkt að ráða Jónu Rún Gísladóttur í stöðu leikskólastjóra leikskólans Huldubergs og hefur hún störf 1. ágúst næstkomandi. Þrjár umsóknir bárust um starfið og var hún valin úr hópi góðra umsækjenda.
Jóna Rún útskrifaðist sem leikskólakennari frá Háskóla Íslands árið 2009 og var að ljúka meistaragráðu í Stjórnun menntastofnana frá sama skóla. Hún á að baki farsælan kennslu- og stjórnendaferil í leikskólanum Huldubergi, sem aðstoðarskólastjóri frá 2022 og sem deildarstjóri 2012-2022.
Hún hefur starfað sem leikskólakennari frá árinu 2010, haldið utan um og átt frumkvæði að sérkennslu, leitt og verið virk í alls kyns faglegu þróunarstarfi og nýjungum í leikskólastarfi, m.a. í samstarfi við RannUng og Nordplus.
„Við erum afskaplega spennt að fá Jónu Rún í nýtt hlutverk í glæsilegum faghópi leikskólastjóra hér í Mosfellsbæ og vitum að hún tekur við góðu búi í leikskólanum Huldubergi.“ Ólöf Kristín Sívertsen sviðsstjóri fræðslu- og frístundarsviðs.
