Dagana 16. – 22. september mun Mosfellsbær taka þátt í Evrópsku Samgönguvikunni, European Mobility Week, en yfirskriftin í ár er á réttri leið.
Tilgangur samgönguvikunnar er að vekja athygli á vistvænum samgöngum og hvetja almenning til að nýta sér almenningssamgöngur, hjólreiðar og aðra vistvæna fararkosti.
Mosfellsbær hefur verið virkur þátttakandi í samgönguvikunni undanfarin ár og í ár verður boðið uppá ýmsa viðburði tengda vistvænum samgöngum bæði í Mosfellsbæ og annars staðar á höfuðborgarsvæðinu.
Meðal þess sem verður í boði er hjólaævintýri í tengslum við Dag íslenskrar náttúru sunnudaginn 16. september, prentun nýs hjóla- og gönguleiðakorts fyrir Mosfellsbæ sem dreift verður á helstu staði í bænum, hjólaþrautir á miðbæjartorgi, málþing um vistvænar samgöngur Hjólum til framtíðar, sem haldið verður í Iðnó föstudaginn 21. september og viðburði tengda átakinu Hjólað í skólann og Bíllausa deginum.
Mosfellingar eru hvattir til að taka þátt í þessu árlega átaki, draga fram hjólið og njóta góðrar útiveru og heilsusamlegrar hreyfingar.
