Í Mosfellsbæ hefur myndast hefð fyrir því að kveðja Eurovision keppendur við hátíðlega athöfn á Miðbæjartorginu séu þeir Mosfellingar.
Þetta er í þriðja sinn á fimm árum sem keppandinn kemur frá Mosfellsbæ og erum við ótrúlega stolt af því.
Föstudaginn 29. apríl klukkan 10:30 munu börn úr leik- og grunnskólum bæjarins sameinast á Miðbæjartorginu og óska keppandanum í ár góðs gengis.
Bæjarbúar eru hvattir til að fjölmenna og taka þátt í skemmtilegri samverustund.
Greta Salóme er bæjarbúum af góðu kunn. Hún hefur verið virkur þátttakandi í menningarlífi bæjarins árum saman og var útnefnd Mosfellingur ársins af bæjarblaðinu Mosfellingi árið 2012.
Mosfellsbær óskar Gretu Salóme góðs gengis í Stokkhólmi en hún stígur á svið þann 10. maí sem er fyrra undanúrslitakvöld keppninnar.