Eftir einstaklega milt haust hefur nú heldur betur kólnað og því hefur aukist álag á hitaveituna.
Sögulegt hámark greindist hjá Veitum í gær í rennsli hitaveitu enda hafa aldrei fleiri íbúðir þarfnast hitunar í svo miklum kulda. Nú þegar hefur verið gripið til ýmissa aðgerða til að mæta þessari stöðu. Meðal annars hefur dælugeta verið aukin á Reynisvatnsheiði og Veitur eru í samstarfi við Orku náttúrunnar um að hækka hitastig á heitu vatni sem kemur frá virkjunum þeirra.
Veitur íhuga nú hvort loka þurfi nokkrum sundlaugum á höfuðborgarsvæðinu á næstu dögum þar sem spáð er áframhaldandi kulda í næstu viku. Ef til þess kemur yrði það einungis í nokkra daga á meðan álagið er mest. Þetta er gert til létta á flutningi vatns og einnig til að minnka álag.
Þær sundlaugar sem verið er að skoða að loka vegna áskorana í flutningskerfum eru Sundhöll Reykjavíkur, Vesturbæjarlaug, Dalslaug, Suðurbæjarlaug og Ásvallalaug. Veitur halda áfram að meta stöðuna og munu upplýsa um lokanir ef til þeirra kemur.
Veitur hvetja fólk til að fara sparlega með heita vatnið
Ekki opna gluggann til kælinga og gott er að athuga með þéttingar á gluggum og hurðum. Einnig er ráð að tryggja að hitakerfið sé að virka rétt og láta ekki renna í heita pottinn á allra köldustu dögunum.
