Stórstúka Íslands keypti jörðina Skálatún í Mosfellssveit árið 1953. Það var svo 30. janúar árið 1954 sem sjálfseignarstofnunin Skálatúnsheimilið var stofnuð. Þann dag fluttu fyrstu þrjú börnin á Barnaheimili Templara við Skálatún eins og það hét þá og ætlunin var að þar myndu búa 17 börn og unglingar.
Frá þessum tíma og til dagsins í dag hafa átt sér stað miklar breytingar á húsnæði og starfsemi Skálatúns auk þess sem að starfsemin hefur fylgt þeirri þróun sem á sér stað í málefnum fatlaðra. Reistar hafa verið nýjar byggingar og í dag eru fimm herbergjasambýli og tvö hús með samtals tíu íbúðum. Nú eru 37 íbúar búsettir í Skálatúni. Þá er einnig á staðnum dagþjónusta, sundlaug, vinnustofur og skrifstofur.
Mosfellsbær og Skálatún gerðu með sér þjónustusamning árið 2012 í kjölfar tilfærslu þjónustu við fatlað fólk frá ríki til sveitarfélaga. Heimilisfólk á Skálatúni og starfsemin þar hefur auðgað mannlíf í Mosfellsbæ og saga þess er óaðskiljanlegur hluti af sögu bæjarins.
Mosfellsbær óskar Skálatúnsheimilinu innilega til hamingju með daginn.
Tengt efni
Sjálfseignastofnun um fasteignir Skálatúns
Í tengslum við samning á milli Mosfellsbæjar, Skálatúns og Jöfnunarsjóðs um þjónustu Mosfellsbæjar við 33 íbúa Skálatúns var jafnframt samþykkt að stofnuð yrði sjálfseignastofnun um rekstur fasteigna Skálatúns.
Íbúar og starfsfólk Skálatúns boðin velkomin
Það var mikið um dýrðir þegar Mosfellsbær bauð íbúa og starfsfólk Skálatúns velkomið í þjónustu Mosfellsbæjar í blíðskaparveðri í Skálahlíðinni þann 3. júlí.
Mosfellsbær tekur við starfsemi Skálatúns og ríkið kemur að uppbyggingu fyrir börn og fjölskyldur í Skálatúni í Mosfellsbæ
Fimmtudaginn 25. maí var undirritaður samningur um að Mosfellsbær taki alfarið að sér að annast og þróa áfram þjónustu við íbúa Skálatúns en í dag búa þar 33 einstaklingar.
