Í júní 2020 tekur SORPA nýja gas- og jarðgerðarstöð í notkun í Álfsnesi (GAJA) en þar verður lífrænum hluta heimilisúrgangs umbreytt í jarðvegsbæti og metan. Til að mæta þörfum vinnslunnar í GAJA og til að auka endurnýtingu heimilisúrgangs hefur verið sett upp vélræn flokkunarlína í móttöku- og flokkunarstöðinni í Gufunesi.
Í júní 2020 tekur SORPA nýja gas- og jarðgerðarstöð í notkun í Álfsnesi (GAJA) en þar verður lífrænum hluta heimilisúrgangs umbreytt í jarðvegsbæti og metan. Til að mæta þörfum vinnslunnar í GAJA og til að auka endurnýtingu heimilisúrgangs hefur verið sett upp vélræn flokkunarlína í móttöku- og flokkunarstöðinni í Gufunesi. Nú standa yfir prófanir og er gert ráð fyrir að flokkunarlínan verði að fullu komin í gagnið í lok júní. Kári vindflokkari fyrir plast í pokum er hluti af nýju vinnslulínunni og hefur hann verið óvirkur á meðan á uppsetningu línunnar hefur staðið.
Íbúar í þeim sveitarfélögum sem skila plasti í pokum með heimilissorpi eru því áfram beðnir um að skila flokkuðu plasti á grenndarstöðvar eða á endurvinnslustöðvar út mánuðinn. Við biðjumst velvirðingar á þeim óþægindum sem þetta kann að valda en hlökkum jafnframt til að taka í notkun nýjar og enn betri vinnsluaðferðir sem munu auka nýtingu heimilisúrgangs verulega.
Nýjar vinnslulínur í móttöku- og flokkunarstöðinni munu samtals innihalda átta málmskiljur, sigti og annan búnað til að aðskilja lífrænan hluta heimilisúrgangsins frá ólífrænum efnum, s.s. plasti og öðru sem þar kann að leynast. Einnig verður þar nýr vindflokkari sem mun aðskilja létt efni, s.s. plast, pappír og textíl frá timbri, gleri og öðrum eðlisþyngri efnum.