Kjarni, Þverholti 2
270 Mosfellsbæ
20. apríl – 17. maí 2024
Eiginleikar / Attributes – Hanna Dís Whitehead
Á sýningunni er leikið með ólíka eiginleika efniviða, forma og hluta.
Þegar við búum okkur heimili mótum við veggi, gólf og loft í rýminu í landslag sem okkur líkar. Við fyllum það af litum, áferðum, formum og minningum. Húsnæðið þarf auk þess að hafa nokkuð notagildi til að mynda þarf að vera hægt að setjast þar niður, elda mat og sofa. Við þurfum líka rými fyrir hugann og flest kjósum við að heimilið sé ennfremur fyrir hjartað og sálina. Heimili okkar getur verið nákvæmlega eins og okkur dettur í hug.
Hlutir innan heimilisins hafa ákveðna eiginleika. Séu þeir fjöldaframleiddir eru eiginleikar þeirra búnir takmörkum þeim sem vélarnar sem framleiða þá hafa. Séu þeir handgerðir eru þeir háðir því valdi sem hendur og hugur hafa yfir efninu sem þeir eru búnir til úr. Á sýningunni mætast ólíkir eiginleikar. Handverk og stafræn tækni, list og hönnun, leir og strá, viður og ull.
Hugmyndavinna Hönnu Dísar hefst oft á því að skoðaðar eru bækur og því rökrétt að sýna í Listasal Mosó sem staðsettur er inn af bókasafni. Bækurnar sem hún skoðar eru oftar en ekki, alls ekkert tengdar þeim verkefnum sem hún hefur sett sér fyrir hendur. Það er betra að skoða eitthvað allt annað til að hreyfa við hugmyndunum, máta þær við ólíka hluti og færa þær þannig um set.
Í verkin notast Hanna Dís meðal annars við endurunnin, sjálfbæran eða íslenskan við í samtali við leir, textíl og strá.
Verkin eru sjálfstætt framhald verka sem sýnd voru á Stockholm Furniture fair í Svíþjóð nú í febrúar en þau sem sýningunni tengjast verða einnig sýnd í samtali við ný verk.
Sýningin er hluti af dagskrá Hönnunarmars en stendur frá 20. apríl til 17. maí.
Vinsamlegast athugið að sýningin fylgir ekki almennum opnunartíma viðburða á Hönnunarmars.
Opnunartími:
- Opið mán – fös 9:00 – 18:00
- Laugardaga: 12:00 – 16:00
- Sunnudaga: Lokað (ekki opið 28. apríl)
- Lokað sumardaginn fyrsta 25. apríl
Verkefnið er styrkt af Myndstef og Hönnunarsjóði.
Sýningin er að hluta í samstarfi við Húsasmiðjuna á Höfn.
Sýningar 2024
6. janúar – 2. febrúar
I think, therefore I am fucked – Jakob Veigar Sigurðsson
9. febrúar – 8. mars
Við sjóinn – Aileen Hammond og Lara Roje
15. mars – 12. apríl
Gróðurhula – Þórunn Bára Björnsdóttir
19. apríl – 17. maí
Hanna Dís Whitehead
24. maí – 21. júní
Rebekka Jóhannesdóttir
28. júní – 26. júlí
Þorgerður Höskuldsdóttir
9. ágúst – 6. september
Ólöf Björg Björnsdóttir
13. september – 11. október
Magga Eddudóttir
18. október – 15. nóvember
List án landamæra
22. nóvember – 20. desember
Listaverkamarkaður
Um Listasalinn
Listasalur Mosfellsbæjar er staðsettur inn af Bókasafni Mosfellsbæjar í Kjarna, Þverholti 2.
Á hverju ári eru settar upp um tíu sýningar, jafnt reyndra listamanna og nýgræðinga á sviðinu. Einnig er salurinn nýttur fyrir ýmsa viðburði eins og tónleika, fyrirlestra og fundi.
Listasalur Mosfellsbæjar hefur það að leiðarljósi að vera virkur samkomustaður fyrir Mosfellinga og aðra gesti, bjóða upp á fjölbreyttar sýningar listamanna og vinna þannig að framþróun myndlistar á Íslandi.
Salurinn er rekinn af Mosfellsbæ og hefur verið starfræktur frá 2005. Hann er opinn á afgreiðslutíma Bókasafnsins og er gengið inn í salinn úr safninu. Salurinn er um 80 fm2 að stærð og honum fylgir eldhúsaðstaða með vaski og ísskáp, aðgengi að fatahengi og salerni. Einnig geta fylgt salnum borð og 75 stólar. Skjávarpi er í salnum og sýningartjald. Gott aðgengi er fyrir hjólastóla.