Sögufélag Kjalarnesþings gengst fyrir söguferð að Mosfelli þriðjudaginn 3. júní nk. kl. 16:00. Tilefnið er að minnast þess að séra Magnús Grímsson prestur á Mosfelli 1855-1860 hefði orðið 200 ára hinn 3. júní 2025.
Magnúsar er ekki síst minnst fyrir að vera upphafsmaður að söfnun þjóðsagna á Íslandi ásamt Jóni Árnasyni. Rifjuð verða upp kvæði sem hann orti, sagt frá ferðabók um Kjósarsýslu sem hann skrifaði, þjóðsögum sem hann safnaði, ræðu sem hann flutti yfir sex vermönnum sem létust á Mosfellsheiði og voru jarðsettir í Mosfellskirkjugarði, og ýmsu öðru. Minningarmörk eru tvö um Magnús á Mosfelli og verða þau skoðuð ásamt brjóstmynd af Ólafíu Jóhannsdóttur sem fædd var á Mosfelli.
Leiðsögumaður verður Bjarki Bjarnason rithöfundur sem alinn er upp á kirkjustaðnum og hefur búið í næsta nágrenni nær alla tíð.
Öll velkomin í ferð Sögufélags Kjalarnesþings þar sem gengið verður um svæðið við Mosfellskirkju og í kirkjugarðinum og rifjaðar upp gamlar sögur og sagnir.
Ferðin er áætluð tæpar tvær klukkustundir.