Þegar vorar stefna margir á framkvæmdir við hús sín og lóðir. Þá er mikilvægt að hafa í huga að ýmsar framkvæmdir geta verið háðar byggingarleyfi, samþykki sveitarfélags, aðliggjandi lóðarhafa eða þarfnast frekari rýni skipulags.
Sækja þarf um byggingarleyfi fyrir:
- Skjólveggjum og girðingum sem eru hærri en 1,80 m yfir landhæð.
- Veggjum og girðingum við lóðarmörk að opnum svæðum, stígum eða götum (í bæjarlandi) sem eru hærri en sem nemur fjarðlægð veggs eða girðingar frá lóðarmörkum.
- Steyptum veggjum og stoðveggjum á lóðum og lóðamörkum.
Undanþegið byggingarleyfi:
- Skjólveggir og girðingar sem eru allt að 1,8 m að hæð og eru ekki nær lóðarmörkum en 1,8 m.
- Girðingar sem eru nær lóðarmörkum en 1,8 m og eru ekki hærri en sem nemur fjarlægðinni að lóðarmörkum þ.e. fjarlægðin frá lóðarmörkum endurspeglar hæðina.
- Skjólveggir sem eru allt að 2,0 m langir og 2,5 m háir og áfastir við hús í a.m.k. 1,8 m fjarlægð frá lóðarmörkum.
- Lóðarhöfum samliggjandi lóða er heimilt að reisa girðingar og skjólveggi allt að 1,8 m að hæð á lóðarmörkum án byggingarleyfis, en með skriflegu samþykki hlutaðeigandi aðila sem skila þarf til byggingafulltrúa.
- Smáhýsi sem er að hámarki 15m² og mesta hæð þaks er 2,5 m mælt frá yfirborði jarðvegs er undanþegið byggingarleyfi. Sé smáhýsið minna en 3,0 m frá aðliggjandi lóð þarf samþykki eigenda aðliggjandi lóðar. Athugið að slík smáhýsi eru ekki ætluð til gistingar eða búsetu. Enda sé framkvæmdin í samræmi við gildandi deiliskipulag.
Hafa í huga:
- Alltaf skal leita samþykkis aðliggjandi lóðarhafa, vegna framkvæmda á lóðamörkum, áður en framkvæmd hefst.
- Það er á ábyrgð lóðarhafa að veggir, grindverk og gróður, sem snúa út að götum og gangstéttum, hindri ekki sjónlínur akandi, hjólandi og gangandi vegfarenda.
- Gróður og frágangur girðinga skal valinn með sjónlínur í huga. Í
einhverjum tilfellum getur þurft að staðsetja girðingu og/eða gróður innar á lóðina til að sjónlínur séu í lagi. - Gróður á lóðarmörkum má ekki vaxa yfir gönguleiðir, umferðarskilti og ljósastaura.