Verið velkomin til móttöku og dagskrár þegar eðalbifreið Laxness kemur heim að Gljúfrasteini laugardaginn 14. júní kl. 16:00. Tilefninu verður fagnað með tónlist, veitingum og stuttum ræðum. Jagúarinn mun renna í hlað kl. 16:15.
Jagúarinn hefur tekið á móti gestum Gljúfrasteins á sumrin en undanfarin ár hefur hann verið í allsherjar yfirhalningu í Borgarholtsskóla. Yfir 50 nemendur skólans hafa unnið við bílinn af miklum metnaði undir dyggri handleiðslu fagkennara og er hann nú orðinn eins og nýr. Jagúarinn er árgerð 1968.
Halldór og Auður Laxness voru mikið smekkfólk á hönnun og voru fallegir bílar ekki undanskildir. Laxness hafði sterkar skoðanir á útliti bílsins og vildi fá hann rjómahvítan, alls ekki hvítan, og leiðrétti fólk gjarnan ef því yfirsást þessi blæbrigðamunur.
Margir hafa komið að þessu góða samstarfsverkefni. Þar má nefna B&L sem lögðu til varahluti, vinnu við vél, aðstöðu og þekkingu; Poulsen sem lögðu til allt efni svo hægt væri að sprauta bílinn; Stólpa gáma sem lánuðu gám; auk áhugafólks sem hefur stutt verkefnið með ráðum og dáð. Þar hefur farið fremstur Ríkarður Már Ríkarðsson, umsjónarmaður Jagúarsins, sem hefur haldið utan um verkefnið fyrir hönd Gljúfrasteins.
Verið velkomin á Jagúarfögnuð á Gljúfrasteini á laugardaginn kl. 16:00.
Bílastæði
Fyrir gesti er bílastæði við veginn fyrir neðan Gljúfrastein. Þegar mikið er um að vera á safninu eru þau stæði þó yfirleitt fljót að fyllast. Þá er hægt að leggja í stæði sem eru hinum megin við Köldukvísl framan við Jónstótt. Til að komast að þeim verður að beygja upp afleggjarann til hægri, áður en komið er að Gljúfrasteini ef keyrt er frá Reykjavík, sem merktur er Helgadal. Ekið er upp Jónstóttarveg.